بۇگىندە ايەلدەر قازاقستان رەسپۋبليكاسى قارۋلى كۇشتەرىنىڭ اجىراماس بولىگىنە اينالىپ، ەلدىڭ قورعانىس قابىلەتىن نىعايتۋعا ەلەۋلى ۇلەس قوسىپ كەلەدى. ولار ەر ازاماتتارمەن قاتار اسكەري قىزمەتتىڭ ءتۇرلى باعىتتارىندا كاسىبي مىندەتتەرىن ابىرويمەن اتقارىپ ءجۇر. قازىرگى تاڭدا قازاقستان ارمياسىنىڭ قاتارىندا 7 مىڭعا جۋىق ايەل قىزمەت ەتەدى. ولاردىڭ مىڭعا جۋىعى – وفيتسەرلەر، ال 6 مىڭنان استامى – كەلىسىمشارت بويىنشا اسكەري قىزمەتشىلەر. سونىمەن قاتار 11 ايەل باسشىلىق لاۋازىمداردى اتقارادى.
ايەل اسكەري قىزمەتشىلەر قارۋلى كۇشتەردىڭ بارلىق تۇرلەرى مەن اسكەر تەكتەرىندە قىزمەت ەتەدى. ولار اسكەري مەديتسينا، پسيحولوگيا، قارجى، زاڭ، بايلانىس، كادر جۇمىسى، ماتەريالدىق-تەحنيكالىق قامتاماسىز ەتۋ، ءىس جۇرگىزۋ جانە اقپاراتتىق تەحنولوگيالار سالالارىندا جاۋاپتى مىندەتتەردى اتقارىپ كەلەدى. بۇل ولاردىڭ تەك كومەكشى قىزمەتتەردە عانا ەمەس، اسكەري باسقارۋ جۇيەسىنىڭ ماڭىزدى بۋىندارىندا دا تابىستى ەڭبەك ەتىپ جۇرگەنىن كورسەتەدى.
سوڭعى جىلدارى ايەلدەردىڭ اسكەري قىزمەتتەگى مۇمكىندىكتەرى ەداۋىر كەڭەيدى. بۇگىندە ولار جاۋىنگەرلىك قامتاماسىز ەتۋ بولىمشەلەرىندە دە قىزمەت اتقارىپ، شتاب وفيتسەرى، نۇسقاۋشى، ۇشقىش، مەرگەن جانە ارنايى ماقساتتاعى بولىمشەلەردىڭ اسكەري قىزمەتشىسى سياقتى كۇردەلى اسكەري ماماندىقتاردى مەڭگەرۋدە. سونىمەن قاتار ايەلدەر ەرلەرمەن بىرگە پاراشيۋتپەن سەكىرىپ، ۇشقىشسىز ۇشۋ اپپاراتتارىن قۇراستىرىپ، باسقارادى جانە قارۋلى كۇشتەردىڭ جاۋىنگەرلىك ازىرلىگىن قامتاماسىز ەتۋ جونىندەگى ماڭىزدى مىندەتتەردى ورىندايدى.
اسكەري مانساپتى تاڭداعان قىز-كەلىنشەكتەر ءۇشىن كاسىبي ءبىلىم الۋعا دا بارلىق جاعداي جاسالعان. 2002 جىلى قۇرلىق اسكەرلەرىنىڭ اسكەري ينستيتۋتىندا العاش رەت «بايلانىس» ماماندىعى بويىنشا ايەل اسكەري ماماندار دايارلانىپ شىقتى. سول تۇلەكتەردىڭ كوپشىلىگى بۇگىنگى كۇنى دە اسكەري قىزمەتىن جالعاستىرىپ، جوعارى وفيتسەرلىك شەندەرگە، ونىڭ ىشىندە پولكوۆنيك اسكەري اتاعىنا دەيىن كوتەرىلدى.
ايەلدەردى اسكەري ماماندىقتارعا دايارلاۋ جۇمىسى بۇگىن دە جۇيەلى تۇردە جالعاسىپ كەلەدى. 2023 جىلدان باستاپ ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى اسكەري-مەديتسينالىق فاكۋلتەتكە قىزداردى قابىلداي باستادى. وقۋدى اياقتاعان تۇلەكتەرگە «لەيتەنانت» العاشقى وفيتسەرلىك اتاعى بەرىلىپ، ولار قازاقستان قارۋلى كۇشتەرى قاتارىندا اسكەري قىزمەتىن جالعاستىرادى.
ايتا كەتۋ كەرەك، قولدانىستاعى زاڭنامادا ايەلدەردى مەرزىمدى اسكەري قىزمەتكە مىندەتتى تۇردە شاقىرۋ كوزدەلمەگەن جانە قازىرگى ۋاقىتتا مۇنداي نورمانى ەنگىزۋ ماسەلەسى قاراستىرىلىپ جاتقان جوق.
قارۋلى كۇشتەرمەن كەلىسىمشارت جاساسۋعا نيەت بىلدىرگەن ازاماتتار اسكەري قىزمەتكە قابىلدانۋ ءتارتىبى، ۇمىتكەرلەرگە قويىلاتىن تالاپتار جانە قىزمەت وتكەرۋ شارتتارى تۋرالى تولىق اقپارات الۋ ءۇشىن تۇرعىلىقتى جەرى بويىنشا جەرگىلىكتى اسكەري باسقارۋ ورگاندارىنا نەمەسە اسكەري بولىمگە جۇگىنە الادى.
