Bügınde äielder Qazaqstan Respublikasy Qaruly küşterınıŋ ajyramas bölıgıne ainalyp, eldıŋ qorǧanys qabıletın nyǧaituǧa eleulı üles qosyp keledı. Olar er azamattarmen qatar äskeri qyzmettıŋ türlı baǧyttarynda käsıbi mındetterın abyroimen atqaryp jür. Qazırgı taŋda Qazaqstan armiiasynyŋ qatarynda 7 myŋǧa juyq äiel qyzmet etedı. Olardyŋ myŋǧa juyǧy – ofiserler, al 6 myŋnan astamy – kelısımşart boiynşa äskeri qyzmetşıler. Sonymen qatar 11 äiel basşylyq lauazymdardy atqarady.
Äiel äskeri qyzmetşıler Qaruly küşterdıŋ barlyq türlerı men äsker tekterınde qyzmet etedı. Olar äskeri medisina, psihologiia, qarjy, zaŋ, bailanys, kadr jūmysy, materialdyq-tehnikalyq qamtamasyz etu, ıs jürgızu jäne aqparattyq tehnologiialar salalarynda jauapty mındetterdı atqaryp keledı. Būl olardyŋ tek kömekşı qyzmetterde ǧana emes, äskeri basqaru jüiesınıŋ maŋyzdy buyndarynda da tabysty eŋbek etıp jürgenın körsetedı.
Soŋǧy jyldary äielderdıŋ äskeri qyzmettegı mümkındıkterı edäuır keŋeidı. Bügınde olar jauyngerlık qamtamasyz etu bölımşelerınde de qyzmet atqaryp, ştab ofiserı, nūsqauşy, ūşqyş, mergen jäne arnaiy maqsattaǧy bölımşelerdıŋ äskeri qyzmetşısı siiaqty kürdelı äskeri mamandyqtardy meŋgerude. Sonymen qatar äielder erlermen bırge paraşiutpen sekırıp, ūşqyşsyz ūşu apparattaryn qūrastyryp, basqarady jäne Qaruly küşterdıŋ jauyngerlık äzırlıgın qamtamasyz etu jönındegı maŋyzdy mındetterdı oryndaidy.
Äskeri mansapty taŋdaǧan qyz-kelınşekter üşın käsıbi bılım aluǧa da barlyq jaǧdai jasalǧan. 2002 jyly Qūrlyq äskerlerınıŋ äskeri institutynda alǧaş ret «Bailanys» mamandyǧy boiynşa äiel äskeri mamandar daiarlanyp şyqty. Sol tülekterdıŋ köpşılıgı bügıngı künı de äskeri qyzmetın jalǧastyryp, joǧary ofiserlık şenderge, onyŋ ışınde polkovnik äskeri ataǧyna deiın köterıldı.
Äielderdı äskeri mamandyqtarǧa daiarlau jūmysy bügın de jüielı türde jalǧasyp keledı. 2023 jyldan bastap ekı märte Keŋes Odaǧynyŋ Batyry Talǧat Bigeldinov atyndaǧy Äue qorǧanysy küşterınıŋ äskeri instituty äskeri-medisinalyq fakultetke qyzdardy qabyldai bastady. Oqudy aiaqtaǧan tülekterge «leitenant» alǧaşqy ofiserlık ataǧy berılıp, olar Qazaqstan Qaruly küşterı qatarynda äskeri qyzmetın jalǧastyrady.
Aita ketu kerek, qoldanystaǧy zaŋnamada äielderdı merzımdı äskeri qyzmetke mındettı türde şaqyru közdelmegen jäne qazırgı uaqytta mūndai normany engızu mäselesı qarastyrylyp jatqan joq.
Qaruly küştermen kelısımşart jasasuǧa niet bıldırgen azamattar äskeri qyzmetke qabyldanu tärtıbı, ümıtkerlerge qoiylatyn talaptar jäne qyzmet ötkeru şarttary turaly tolyq aqparat alu üşın tūrǧylyqty jerı boiynşa jergılıktı äskeri basqaru organdaryna nemese äskeri bölımge jügıne alady.
