وڭىرلىك ەكولوگيالىق سامميت اياسىندا قازاقستان مەن رەسەي ۇكىمەتارالىق كوميسسياسىنىڭ تەڭ توراعالارى - قازاقستان رەسپۋبليكاسى پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين مەن رەسەي فەدەراتسياسى ۇكىمەتى توراعاسىنىڭ ورىنباسارى الەكسەي وۆەرچۋك ەكىجاقتى كەزدەسۋى وتكىزدى.

سەرىك جۇمانعارين رەسەي قازاقستاننىڭ نەگىزگى ستراتەگيالىق جانە ساۋدا-ەكونوميكالىق ارىپتەسىنىڭ ءبىرى ەكەنىن اتاپ ءوتتى.

وتكەن جىلعى قورىتىندى بويىنشا ءوزارا ساۋدا كولەمى $27,4 ملرد-قا جەتتى. ينۆەستيتسيالىق ىنتىماقتاستىقتىڭ وڭ سەرپىنى ساقتالۋدا: سوڭعى 20 جىلدا رەسەيلىك ينۆەستورلار قازاقستان ەكونوميكاسىنا $28,5 ملرد تىكەلەي ينۆەستيتسيا قۇيعان. وسى كەزەڭدە رەسەيگە $9 ملرد قازاقستاندىق ينۆەستيتسيا سالىندى.

قازاقستاندا رەسەيدىڭ قاتىسۋىمەن 22 مىڭنان استام كومپانيا جۇمىس ىستەيدى. بۇل شەتەلدىك كاپيتالى بار كاسىپورىنداردىڭ جالپى سانىنىڭ 35%-ىنان استام.

كەزدەسۋ بارىسىندا كەڭ اۋقىمدى ەكىجاقتى ءوزارا ءىس-قيمىل ماسەلەسى قارالدى. «سولتۇستىك – وڭتۇستىك» حالىقارالىق كولىك ءدالىزىنىڭ شىعىس باعىتىن دامىتۋدى جانە باسقا دا ماسەلەلەردى قوسقاندا، كولىك سالاسىنا باستى نازار اۋدارىلدى.

ەرتىس وزەنىنىڭ سۋ شارۋاشىلىعى مەن سۋ-ەنەرگەتيكالىق پايدالانىلۋىنىڭ نەگىزگى جوسپارىن دايىنداۋ بارىسى دا عىلىمي-زەرتتەۋ جۇمىسى فورماتىندا تالقىلاندى. قازىرگى ۋاقىتتا ەكى ەلدىڭ سالالىق ۆەدومستۆولارىنا تەحنيكالىق كومەك كورسەتۋ تۋرالى شارت جوباسى پىسىقتالۋدا.

اۋىل شارۋاشىلىعى سالاسىندا قازاقستاندىق تاراپ قولدانىستاعى شەكتەۋلەردى الىپ تاستاۋ ماسەلەسىن كوتەردى. بۇل جەردە اڭگىمە قازاقستاندىق استىق پەن بۇرشاق داقىلىن رەسەي فەدەراتسياسىنىڭ تەڭىز پورتتارى ارقىلى جيناقتاپ، ترانزيتتەۋ تۋرالى، سونداي-اق ءۇشىنشى ەلدەردەن شىققان زىعىر، جاسىمىق، كۇنباعىس تۇقىمدارىن، كەسىلگەن گۇلدەر مەن بۇرشىكتەردى سەبۋ ءۇشىن اكەلۋ تۋرالى بولىپ وتىر.

اۋىل شارۋاشىلىعى ۆيتسە-ءمينيسترى ەرمەك كەنجەحانۇلى اتاپ وتكەندەي، بۇل ماسەلە 2024 جىلدان بەرى كۇن تارتىبىندە تۇر. وسى ۋاقىت ىشىندە بىرقاتار پوزيتسياداعى شەكتەۋ الىنىپ تاستالدى. ونىڭ ىشىندە قىزاناق، بۇرىش جانە جەكەلەگەن ايماقتاردان بيداي جەتكىزۋ بار. بۇل رەتتە ءسوز بولىپ وتىرعان ءونىم ساناتتارى بويىنشا شەكتەۋ ساقتالۋدا.

ول وتكەن جىلدان باستاپ وسى ءونىمدى جەتكىزۋ كەزىندە سانيتارلىق جانە كارانتيندىك تالاپتىڭ بۇزىلۋى تىركەلمەگەنىن، وسىعان بايلانىستى قازاقستاندىق تاراپ قالعان شەكتەۋلەردى الىپ تاستاۋ مۇمكىندىگىن قاراستىرۋدى ۇسىنىپ وتىرعانىن اتاپ ءوتتى.

كەزدەسۋ قورىتىندىسىندا تاراپتار سىندارلى شەشىم ازىرلەۋ ءۇشىن ايتىلعان بارلىق ماسەلەنى ودان ءارى پىسىقتاۋعا دايىن ەكەندىكتەرىن راستادى.