استاناداعى بۇل كەزدەسۋ قازاق ءمينيسترىنىڭ 2024 جىلى قازان ايىندا يتاليادا وتكەن ساۋدا-ەكونوميكالىق ميسسياسىنىڭ جالعاسى بولىپ تابىلادى.

تاراپتار ساۋدا-ەكونوميكالىق قارىم-قاتىناستاردى ودان ءارى دامىتۋ جانە قازاقستان مەن يتاليا اراسىنداعى ەكىجاقتى ساۋدا كولەمىن ۇلعايتۋ ماسەلەلەرىن تالقىلادى. قازاقستان مەن يتاليا، سونداي-اق باسقا دا ەلدەر اراسىنداعى ەكسپورتتىق-يمپورتتىق جەتكىزىلىمدەر تىزبەگىن ءبىر جولعا قويۋ قاجەتتىلىگى ايتىلدى.

2024 جىلدىڭ 11 ايىنىڭ قورىتىندىسى بويىنشا قازاقستان مەن يتاليا اراسىنداعى تاۋار اينالىمى 18,2 ملرد، اقش دوللارىن قۇرادى. وسى كەزەڭدە قازاقستاننان يتالياعا ەكسپورت 27,3% -عا ءوسىپ، 17 ملرد اقش دوللارىن قۇرادى.

مينيستر ارمان شاققاليەۆ اۆياتاسىمالىنىڭ سەنىمدى لوگيستيكانى قامتاماسىز ەتۋدەگى نەگىزگى ءرولىن اتاپ ءوتتى. قازاقستان ءوزىنىڭ ستراتەگيالىق گەوگرافيالىق ورنالاسۋىنىڭ جانە اۋەجاي ينفراقۇرىلىمىنىڭ سەرپىندى دامۋىنىڭ ارقاسىندا جۇكتەردى ءتيىمدى جەتكىزۋ مۇمكىندىكتەرىن ۇسىنا الادى. بۇگىندە قازاقستانعا جۇك رەيستەرىن يتالياندىق «Neos» اۆياكارگو-كومپانياسى جەتكىزىپ جاتىر.

سونداي-اق كەزدەسۋدە «Ansaldo» يتالياندىق ونەركاسىپتىك كومپانياسىنىڭ قازاقستان اۋماعىندا ەلەكتر تۋربينالارى ءوندىرىسىن ورنالاستىرۋعا مۇددەلى ەكەندىگى ايتىلدى. بۇل جوبا قازاقستاننىڭ ونەركاسىپتىك الەۋەتىن نىعايتۋدا جانە يتاليامەن ەكونوميكالىق سەرىكتەستىكتى تەرەڭدەتۋدە ماڭىزدى قادام بولۋى مۇمكىن.

كەزدەسۋ سوڭىندا بيىلعا جوسپارلانىپ وتىرعان قازاقستان-يتاليا بيزنەس-فورۋمىن ۇيىمداستىرۋ ماسەلەسى تالقىلاندى. فورۋمعا ەكى ەلدىڭ 100-گە جۋىق كومپانياسى مەن 200-دەن استام بيزنەس وكىلى قاتىسادى دەپ كۇتىلۋدە.