كەزدەسۋ بارىسىندا تاراپتار ەكىجاقتى ىنتىماقتاستىقتىڭ جوعارى دەڭگەيىن اتاپ ءوتىپ، ەۋرازيالىق ەكونوميكالىق وداق اياسىندا ساۋدا-ەكونوميكالىق بايلانىستاردى ودان ءارى نىعايتۋعا نيەتتى ەكەندەرىن ءبىلدىردى.
ارمان شاققاليەۆ ارمەنيانىڭ قازاقستان ءۇشىن سەنىمدى ەكونوميكالىق ارىپتەس قانا ەمەس، سونداي-اق ءوزارا سەنىم مەن قولداۋعا نەگىزدەلگەن تىعىز وداقتاس ەكەنىن اتاپ ءوتتى. تاراپتار قازىرگى گەوەكونوميكالىق جاعدايدا ءوزارا ساۋدانى، ونەركاسىپتىك كووپەراتسيانى جانە ينۆەستيتسيالىق ىنتىماقتاستىقتى كەڭەيتۋگە زور مۇمكىندىك بار ەكەنىن اتاپ ءوتتى.
«ارمەنيا نارىعى قازاقستاندىق وڭدەلگەن ونىمدەر ەكسپورتىنا ايرىقشا قىزىعۋشىلىق تانىتىپ وتىر. بۇگىندە ءبىز جالپى سوماسى 348,2 ملن اقش دوللارىنان اساتىن شيكىزاتتىق ەمەس 70-كە جۋىق تاۋار پوزيتسياسىن جەتكىزۋ بويىنشا جۇمىس جۇرگىزىپ جاتىرمىز. ارمەنيا ۇكىمەتىمەن بىرلەسىپ جەتكىزۋ شارتتارىن ناقتىلاۋعا دايىنبىز»، –دەدى ارمان شاققاليەۆ.
كەزدەسۋ اياسىندا ەكسپورتتى قولداۋ قۇرالدارىنا دا ەرەكشە نازار اۋدارىلدى. 2023 جىلدىڭ ناۋرىز ايىندا ۇيىمداستىرىلعان بيزنەس-ميسسيا بارىسىندا قازاقستاندىق كاسىپكەرلەر ارميان يمپورتتاۋشىلارمەن جانە ساۋدا جەلىلەرىنىڭ وكىلدەرىمەن كەزدەسىپ، بىرقاتار كەلىسسوزدەر وتكىزدى. اتاپ ايتقاندا، اۋىل شارۋاشىلىعى ونىمدەرىن قايتا وڭدەۋ سالاسىنداعى بىرلەسكەن وندىرىستەردى قۇرۋ، سونداي-اق «قازاقستاننىڭ ەكسپورتتىق-كرەديتتىك اگەنتتىگى» اق تاراپىنان ەكسپورتقا باعىتتالعان جوبالاردى قارجىلاندىرۋ جانە ساقتاندىرۋ ماسەلەلەرى قاراستىرىلدى. قازاقستاندىق تاراپ ارميان ارىپتەستەرىن وسى باستامالارعا بەلسەندى تۇردە قاتىسۋعا شاقىردى.
مينيسترلەر ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ۇيلەستىرۋشى ورگان رەتىندەگى ماڭىزدى ءرولىن اتاپ ءوتتى. كوميسسيانىڭ 11-وتىرىسىن 2025 جىلعى 10 ماۋسىمدا بەينەكونفەرەنتسيا فورماتىندا وتكىزۋ جوسپارلانىپ وتىر. كەزدەسۋ كۇن تارتىبىندە لوگيستيكالىق مارشرۋتتاردى دامىتۋ، رەتتەۋشى راسىمدەردى ۇيلەستىرۋ، تسيفرلاندىرۋ جانە بىرلەسكەن سالالىق باستامالاردى ىسكە اسىرۋ ماسەلەلەرى قاراستىرىلماق.
سونداي-اق مەملەكەت باسشىسىنىڭ 2023 جىلعى ءساۋىر ايىندا ارمەنياعا جاساعان ساپارى بارىسىندا قول قويىلعان 2024–2025 جىلدارعا ارنالعان ساۋدا-ەكونوميكالىق ىنتىماقتاستىق جونىندەگى جول كارتاسىن ىسكە اسىرۋ ماسەلەسىنە ەرەكشە نازار اۋدارىلدى. قۇجات ءوزارا ساۋدانى ىنتالاندىرۋ، ينفراقۇرىلىمدى جانە بىرلەسكەن وندىرىستەردى دامىتۋ، تەحنيكالىق جانە اكىمشىلىك كەدەرگىلەردى جويۋ شارالارىن قامتيدى.
كەزدەسۋ سوڭىندا ەكسپورت شارتتارى مەن تەحنيكالىق رەتتەۋ سالاسىنداعى جەكەلەگەن ماسەلەلەر تالقىلاندى. قازاقستان تاراپى ءوز ۇستانىمىنىڭ اشىقتىعىن راستاي وتىرىپ، ەۋرازيالىق ەكونوميكالىق وداقتىڭ قولدانىستاعى نورمالارى مەن ۇلتتىق زاڭناما شەڭبەرىندە كەدەرگىلەردى جويۋ بويىنشا بىرلەسىپ جۇمىس ىستەۋگە دايىن ەكەنىن مالىمدەدى.
