قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ پەن چەح رەسپۋبليكاسىنىڭ پرەمەر-ءمينيسترى اندرەي بابيش استانادا ەكى ەلدىڭ ىسكەر توپتارى وكىلدەرىنىڭ باسىن قوسقان «قازاقستان-چەحيا» بيزنەس فورۋمىنا قاتىستى. جيىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى، ونەركاسىپ كووپەراتسياسىن دامىتۋعا، سونداي-اق ماشينا جاساۋ، كولىك، ەنەرگەتيكا، ءىت، اۆياتسيا ونەركاسىبى جانە باسقا دا سالالارداعى بىرلەسكەن جوبالاردى جۇزەگە اسىرۋعا نازار اۋدارىلدى.

فورۋمعا قاتىسۋشىلارعا ارناعان العىسوزىندە قر پرەمەر-ءمينيسترى ولجاس بەكتەنوۆ بيزنەسپەن جانە ينۆەستورلارمەن ديالوگتى دامىتۋ قازاقستان ءۇشىن باسىم مانگە يە ەكەنىن اتاپ ءوتتى.

«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، قازاقستان پرواكتيۆتى ينۆەستيتسيالىق ساياساتتى جۇزەگە اسىرۋدا جانە ۇزاقمەرزىمدى ينۆەستورلار ءۇشىن اشىق بولىپ قالا بەرمەك. بيزنەسپەن سەنىمدى ديالوگ قۇرۋ – بۇل جۇمىستىڭ ماڭىزدى بولىگى. بۇگىن قازاقستاندىق جانە چەحيالىق كومپانيالاردىڭ كوپتەگەن وكىلدەرىن كورگەنىمە قۋانىشتىمىن. ءبىر-ءبىرىمىزدىڭ مىقتى جاقتارىمىزدى پايدالانا وتىرىپ جانە ىنتىماقتاستىقتىڭ جاڭا باعىتتارىن قاراستىرىپ، ءبىز ءوزارا ءتيىمدى سەرىكتەستىك قۇرا الامىز»، — دەپ اتاپ ءوتتى ولجاس بەكتەنوۆ.

«قازاقستان، بۇل – قۇرلىقتار اراسىنداعى كوپىر عانا ەمەس، يننوۆاتسيالار مەن ستراتەگيالىق ينۆەستيتسيالار ءۇشىن دە جاھاندىق حاب. ءبىزدىڭ قارىم-قاتىناسىمىز ءوزارا سىيلاستىقتىڭ جانە تابىستى جوبالاردىڭ دالەلدەنگەن تاجىريبەسىنە نەگىزدەلگەن. قازاقستانعا دەگەن قىزىعۋشىلىق – ءبىز ءۇشىن ۇزاق مەرزىمدى ستراتەگيالىق باسىمدىق»، — دەپ اتاپ ءوتتى چەحيا پرەمەر-ءمينيسترى اندرەي بابيش.

جۇزەگە اسىرىلىپ جاتقان ينۆەستيتسيالىق ساياسات شەڭبەرىندە قازاقستاندا بيزنەس ءۇشىن جاعدايلاردى جاقسارتۋ بويىنشا شارالار قابىلدانۋدا. «بايتەرەك» حولدينگى ۇلتتىق ينۆەستيتسيالىق حولدينگ بولىپ قايتا قۇرىلدى. Kazakh Invest ۇلتتىق كومپانياسىنىڭ پريوريتەتتى نارىقتارعا قاتىسۋ اۋقىمى كەڭەيۋدە، بىرىڭعاي قولداۋ ورتالىعى رەتىندە Kazakhstan Investment House قۇرۋ جوسپارلانۋدا. باس پروكۋراتۋرا جانىنان ينۆەستورلاردىڭ قۇقىقتارىن قورعاۋ كوميتەتى قۇرىلدى. ءىرى ينۆەستورلار ءۇشىن زاڭنامانىڭ 25 جىلعا دەيىنگى تۇراقتىلىعىن قامتاماسىز ەتەتىن ينۆەستيتسيالىق كەلىسىمدەر كوزدەلگەن.

جۇرگىزىلىپ جاتقان جۇمىستاردىڭ ناتيجەسىندە وتكەن جىلى قازاقستان ەكونوميكاسىنا تارتىلعان تىكەلەي شەتەلدىك ينۆەستيتسيالار كولەمى 14,4%-عا ءوسىپ، جالپى سوماسى $20,5 ملرد-قا جەتتى. بۇۇ ازيا مەن تىنىق مۇحيتقا ارنالعان ەكونوميكالىق جانە الەۋمەتتىك كوميسسياسى (ەسكاتو) دەرەكتەرىنە سايكەس، قر اۋماعىندا نولدەن باستاپ قۇرىلاتىن جاڭا جوبالارعا $19 ملرد تىكەلەي شەتەلدىك ينۆەستيتسيالار سالىندى (greenfield project). بۇل ورتالىق ازياداعى بارلىق وڭىرارالىق سالىمداردىڭ 89%-ىن قۇرادى.

چەح كومپانيالارىنىڭ قازاقستانمەن ءوزارا ءىس-قيمىلدى كەڭەيتۋگە جانە نارىقتاعى قاتىسۋىن ارتتىرۋعا قىزىعۋشىلىعى اتاپ ءوتىلدى. ءوزارا تابىستى ءىس-قيمىل مىسالدارىنىڭ ءبىرى – Škoda Auto كومپانياسىنىڭ $8,2 ملن-عا اۆتوكولىك قۇراستىرۋ جوباسىن ىسكە قوسۋى. BBS كاسىپورنى وسى جىلدىڭ سوڭىنا دەيىن $9 ملن-عا جىلۋ الماستىرعىش جابدىقتار ءوندىرىسىن باستاۋدى جوسپارلاپ وتىر. ەنەرگەتيكالىق سەكتوردا بۇرىن جاسالعان ۋران جەتكىزۋ تۋرالى ۇزاقمەرزىمدى كەلىسىم شەڭبەرىندە «قازاتومونەركاسىپ» ۇاك» اق-مەن ČEZ كومپانياسىنىڭ سەرىكتەستىگى پەرسپەكتيۆالى بولىپ سانالادى.

فورۋم قورىتىندىسى بويىنشا قازاقستان مەن چەحيا كومپانيالارى اراسىندا ىنتىماقتاستىق تۋرالى 6 مەموراندۋمعا قول قويىلدى. ەنەرگەتيكا، كولىك، ماشينا جاساۋ، ساقتاندىرۋ جانە تاعى دا باسقا سالالاردا بىرلەسكەن كاسىپورىندار قۇرۋ كوزدەلگەن.

ۇكىمەتتىڭ ءباسپاسوز قىزمەتى

#ولجاس بەكتەنوۆ #قر پرەمەر-ءمينيسترى #حالىقارالىق ىنتىماقتاستىق #تسيفرلاندىرۋ