اتالعان جۇمىس مەملەكەت باسشىسىنىڭ زايسان، كاتون-قاراعاي جانە كەندىرلى كۋرورتتىق ايماقتارىندا ءۇش جاڭا اۋەجاي سالۋ جونىندەگى تاپسىرماسى اياسىندا جۇرگىزىلۋدە. نىسانداعى قۇرىلىس جۇمىسىنىڭ بارىسىن كولىك ءمينيسترى مارات قاراباەۆ پەن شىعىس قازاقستان وبلىسىنىڭ اكىمى نۇرىمبەت ساقتاعانوۆ تەكسەردى.
قاتونقاراعاي اۋدانىنداعى اۋەجاي بەلقاراعاي اۋىلى ماڭىنداعى 266 گەكتار جەردە ورنالاسادى. اۋەجاي ايماقتىڭ كليماتتىق جانە گەوگرافيالىق جاعدايىن ەسكەرە وتىرىپ سالىنۋدا. جوبا اياسىندا الداعى ۋاقىتتا كەڭەيتۋ مۇمكىندىگى بار 2,2 مىڭ مەترلىك ۇشۋ-قونۋ جولاعى قاراستىرىلدى. Bombardier Q400, ATR-72 جانە باسقا دا ۇقساس تيپتەگى زاماناۋي اۋە كەمەلەرىن قابىلداۋ كوزدەلگەن. سونىمەن قاتار جوبا اياسىندا تولىققاندى ينفراقۇرىلىم قۇرۋ: 4 اۋە كەمەسىنە ارنالعان پەررون، 4 مىڭ شارشى مەترلىك زاماناۋي اەروۆوكزال، كوماندالىق-ديسپەتچەرلىك پۋنكت، اپاتتىق-قۇتقارۋ قىزمەتى، مەتەوستانسا جانە راديوناۆيگاتسيالىق جابدىقتار قاراستىرىلعان. اۋەجايدىڭ وتكىزۋ قابىلەتى ساعاتىنا 150 جولاۋشىنى قۇرايدى، بۇل ايماق ءۇشىن وڭتايلى ءارى ورنىقتى اۋە قاتىناسى ءۇشىن تۇراقتى نەگىز بولماق.
«قازىردىڭ وزىندە قاتونقاراعايعا جىلىنا 100 مىڭعا جۋىق تۋريست كەلەدى. الداعى بەس جىلدا بۇل كورسەتكىش 250 مىڭ ادامعا دەيىن ارتادى دەپ كۇتىلۋدە. بۇل باعىت قازاقستاندىق جانە شەتەلدىك قوناقتار اراسىندا سۇرانىسقا يە. نىسان قولدانىسقا تاپسىرىلعان سوڭ كاتون-قاراعايدان استاناعا، الماتىعا جانە وسكەمەنگە، سونداي-اق التاي مەن قاناسقا (قحر), بايان-ولگەيگە (موڭعوليا) دەيىن قاتىنايتىن حالىقارالىق رەيستەر اشىلادى. كولىك مينيسترلىگى جۇمىستىڭ ورىندالۋ مەرزىمى مەن ساپاسىن ءجىتى باقىلايدى»، — دەپ اتاپ ءوتتى كولىك ءمينيسترى مارات قاراباەۆ.
شىعىس قازاقستان وبلىسىندا تۋريزم سالاسىن ودان ءارى دامىتۋ ءۇشىن كولىك مينيسترلىگى تۋريستىك نىساندارعا اپاراتىن بارلىق جولداردى جوندەيدى.
«بيىل قالباتاۋ – مايقاپشاعاي تاس جولىنىڭ قۇرىلىسى اياقتالادى. التاي مەن قاتونقاراعاي ەلدى مەكەندەرى اراسىنداعى، ودان ءارى راحمان قاينارىنا دەيىنگى ۋچاسكەدە جۇمىستار جۇرگىزىلىپ جاتىر. مارقاكول كولىنە دەيىن كولىك قوزعالىسىن قامتاماسىز ەتۋ ءۇشىن بيىلدان باستاپ تەرەكتى – ۇرىنحاي جولىن جوندەۋ، سونىمەن قاتار جالپى ۇزىندىعى 120 شاقىرىمدى قۇرايتىن اۋستريا جولىنداعى كوپىرلەر مەن قۇبىرلاردى جوندەۋ جوسپارلانعان. بۇدان بولەك، اباي وبلىسى باعىتىنا قاراي سەمەي قالاسىنا دەيىن، سونداي-اق ريددەر جانە شەمونايحا قالالارىنا دەيىن جولدار جوندەلىپ جاتىر، بۇل قوسىمشا تۋريستەر اعىنىن قامتاماسىز ەتەدى»، — دەدى كولىك ءمينيسترى مارات قاراباەۆ.
«بۇل اۋقىمدى جوبا ءوڭىر ءۇشىن ۇلكەن سەرپىلىس بولىپ، ەكونوميكالىق ءوسۋدىڭ جاڭا مۇمكىندىكتەرىن اشادى. اۋەجايلاردىڭ قۇرىلىسى ءتۋريزمنىڭ دامۋىنا، كولىك-لوگيستيكا ينفراقۇرىلىمىنىڭ نىعايۋىنا جانە شەتەلدىك ينۆەستيتسيا تارتۋعا قۋاتتى سەرپىن بەرەدى. جاڭا كاسىپورىندار اشىلىپ، قوسىمشا جۇمىس ورىندارى قۇرىلىپ، سالىق تۇسىمدەرى ارتادى دەپ كۇتىلۋدە. ناتيجەسىندە، وڭىردە حالىق تابىسىنىڭ وسۋىنە، تۇرمىس ساپاسىنىڭ جاقسارۋىنا جانە وبلىستىڭ الەۋمەتتىك-ەكونوميكالىق الەۋەتىنىڭ ودان ءارى نىعايۋىنا ىقپال ەتەتىن ايتارلىقتاي مۋلتيپليكاتيۆتى اسەر بولادى»، — دەپ اتاپ ءوتتى ءوڭىر اكىمى نۇرىمبەت ساقتاعانوۆ.
