جيىنعا پرەمەر-مينيستر ولجاس بەكتەنوۆ، ۇكىمەت مۇشەلەرى، ۇلتتىق بانك توراعاسى، وبلىستار مەن استانا، الماتى جانە شىمكەنت قالالارىنىڭ اكىمدەرى، ورتالىق مەملەكەتتىك ورگاندار مەن ۇلتتىق كومپانيالاردىڭ جەتەكشىلەرى قاتىستى. مەملەكەت باسشىسى جيىن بارىسىندا ۇكىمەت جۇمىسىنىڭ باستى باعىتتارىن ايقىندادى. اتاپ ايتقاندا، قاسىم-جومارت توقاەۆ ەكونوميكانى ءارتاراپتاندىرۋ، ينفراقۇرىلىمدى دامىتۋ ءىسىن جاڭا دەڭگەيگە كوتەرۋ، تسيفرلىق تەحنولوگيانى جان-جاقتى ەنگىزۋ، ەنەرگەتيكانى دامىتۋ جانە يادرولىق كلاستەر قۇرۋ، اگروونەركاسىپ كەشەنىنىڭ الەۋەتىن ارتتىرۋ، سالىق-بيۋدجەت ساياساتىن رەفورمالاۋ، ماڭىزدى جوبالاردى قارجى كوزدەرىمەن قامتاماسىز ەتۋ، سونداي-اق الەۋمەتتىك قولداۋ ءىسىن رەتتەپ، دەنساۋلىق ساقتاۋ، ءبىلىم بەرۋ جانە عىلىم سالاسىن ودان ءارى دامىتۋ جونىندەگى ناقتى مىندەتتەر مەن جوسپارلارعا توقتالدى.
پرەزيدەنتتىڭ پىكىرىنشە، العا قويعان مىندەتتەردى جۇزەگە اسىرۋ ءۇشىن تۇتاس مەملەكەتتىك اپپارات ءتيىمدى جۇمىس ىستەۋى كەرەك.
– جاڭا ءداۋىردىڭ سىن-قاتەرلەرى از ەمەس. ونى ەڭسەرۋ ءۇشىن بىزگە ءتيىستى ستراتەگيا كەرەك. مەن رەفورمالاردىڭ ناقتى باعىتى مەن ونى جۇزەگە اسىرۋ جولدارى تۋرالى وسىعان دەيىن دە ايتتىم. ۇكىمەت ەل ەكونوميكاسىن تۇرالاپ قالۋدان ساقتاپ، ورنىقتى دامۋدى قامتاماسىز ەتۋ ءۇشىن كۇردەلى شەشىمدەر قابىلداۋى كەرەك جانە ەڭ باستىسى سول شەشىمدەردى ىسكە اسىرۋعا ءتيىس. بۇل – جوعارى بىلىكتى ءارى جاۋاپكەرشىلىك الۋعا دايىن مەملەكەتتىك قىزمەتشىلەردىڭ قولىنان كەلەتىن جۇمىس. الەمدىك تاجىريبەگە قاراساق، مەملەكەتتىك اپپاراتتىڭ تيىمدىلىگى وسىنداي كۇردەلى كەزەڭدەردە ايقىن كورىنەدى. ۇكىمەت قانشالىقتى قيىن بولسا دا، جاپپاي ۇنەمدەۋگە كوشىپ، بيۋدجەت قارجىسىن تەك قانا اسا وزەكتى ماسەلەلەردى شەشۋگە جۇمساۋى كەرەك. كورپەگە قاراي كوسىلەتىن ۋاقىت كەلدى. ورىنسىز شىعىندى توقتاتىپ، اياعىمىزدى تارتىپ باسۋ قاجەت، – دەدى قاسىم-جومارت توقاەۆ.
جيىندا پرەمەر-مينيستر ولجاس بەكتەنوۆ ەلىمىزدىڭ وتكەن كەزەڭدەگى الەۋمەتتىك-ەكونوميكالىق دامۋى مەن ۇكىمەتتىڭ بيىلعا ارنالعان جوسپارلارى تۋرالى باياندادى. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ەلىمىزدىڭ فيسكالدىق جۇيەسىن، ياعني سالىق جانە بيۋدجەت سالاسىن رەفورمالاۋعا قاتىستى ۇستانىمداردى تانىستىردى. اقشا-نەسيە ساياساتىنا قاتىستى ماسەلەلەر بويىنشا ۇلتتىق بانك توراعاسى تيمۋر سۇلەيمەنوۆ ءسوز سويلەدى. «سامۇرىق-قازىنا» قورىنىڭ باسقارما توراعاسى نۇرلان جاقىپوۆ قوردىڭ قىزمەتى تۋرالى ەسەپ بەردى.
بۇدان بولەك، استانا قالاسىنىڭ اكىمى جەڭىس قاسىمبەك، شىمكەنت قالاسىنىڭ اكىمى عابيت سىزدىقبەكوۆ جانە قىزىلوردا وبلىسىنىڭ اكىمى نۇرلىبەك نالىباەۆ بايانداما جاسادى.
اقپارات: اقوردا.كز
