مەملەكەت باسشىسى جاريالاعان «زاڭ مەن ءتارتىپ» قاعيداتىن ىسكە اسىرۋ اياسىندا ارال اۋدانىندا تۇرعىندارمەن اقپاراتتىق-ءتۇسىندىرۋ كەزدەسۋى ءوتتى. جيىندى اۋدان اكىمىنىڭ ورىنباسارى ن. بوحاەۆ جۇرگىزدى. كەزدەسۋگە قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ وكىلدەرى قاتىسىپ، قارجى پيراميدالارىنىڭ بەلگىلەرى، الاياقتاردىڭ ءجيى قولداناتىن تاسىلدەرى جانە كۇماندى ينۆەستيتسيالىق جوبالاردان ساقتانۋ جولدارى تۋرالى كەڭىنەن ءتۇسىندىردى.
شارا بارىسىندا تۇرعىندارعا جەكە قاراجاتتىڭ قاۋىپسىزدىگىن قامتاماسىز ەتۋ، تسيفرلىق الاياقتىقتان قورعانۋ جانە قارجىلىق شەشىم قابىلداۋ كەزىندە ساقتىق شارالارىن ساقتاۋ جونىندە جان-جاقتى اقپارات بەرىلدى.
كەزدەسۋ بارىسىندا تۇرعىندار وزدەرىن تولعاندىرعان ساۋالدارىن قويىپ، مامانداردان تولىققاندى جاۋاپ الدى. سونداي-اق زاڭ بۇزۋشىلىقتاردىڭ الدىن الۋدا ءار ازاماتتىڭ جاۋاپكەرشىلىگى مەن قۇقىقتىق مادەنيەتتى قالىپتاستىرۋدىڭ ماڭىزدىلىعى ەرەكشە اتاپ ءوتىلدى.
ءىس-شارا سوڭىندا قاتىسۋشىلارعا اقپاراتتىق جادىنامالار تاراتىلىپ، كۇماندى قارجىلىق ۇسىنىستارعا سەنبەۋگە جانە زاڭسىز ارەكەتتەرگە تاپ بولعان جاعدايدا قۇزىرلى ورگاندارعا دەرەۋ حابارلاسۋعا شاقىرىلدى.
