قاراعاندى وبلىسى العاشقى ۇلتتىق AI Governance Cup بايقاۋىنىڭ جەڭىمپازدارىنىڭ ءبىرى اتاندى. ءوڭىر «تسيفرلىق رەانيماتسيا» جوباسىن ۇسىنىپ، ۇزدىك دەپ تانىلدى. بۇل جوبا — مەديتسينالىق دەرەكتەردى ناقتى ۋاقىت رەجيمىندە زياتكەرلىك تۇردە جيناۋ مەن تالداۋعا ارنالعان جۇيە. بايقاۋدىڭ فينالى استانادا مەملەكەت باسشىسى قاسىم-جومارت توقاەۆتىڭ قاتىسۋىمەن ءوتتى.

بيىل ناۋرىز ايىندا باستالعان بايقاۋعا مەملەكەتتىك ورگانداردان، كۆازيمەملەكەتتىك سەكتور ۇيىمدارىنان جانە اكىمدىكتەردەن بارلىعى 184 ءوتىنىم تۇسكەن. جوبالاردى قازاقستاندىق جانە حالىقارالىق ساراپشىلاردان قۇرالعان كوميسسيا باعالادى. ولاردىڭ قاتارىندا قر پرەزيدەنتى جانىنداعى جاساندى ينتەللەكتتى دامىتۋ جونىندەگى كەڭەس وكىلدەرى دە بولدى. حالىقارالىق ساراپتاماعا، اتاپ ايتقاندا، Sinovation Ventures نەگىزىن قالاۋشى كاي-فۋ لي مەن ستەنفورد ۋنيۆەرسيتەتىنىڭ پروفەسسورى پيتەر نورۆيگ قاتىستى.

قاراعاندى وبلىسى «AI ازاماتتارعا قىزمەت» نوميناتسياسى بويىنشا جەڭىمپاز اتانسا، وزگە بەس نوميناتسيادا دا لاۋرەاتتار انىقتالدى.

بايقاۋدى جاساندى ينتەللەكت جانە تسيفرلىق دامۋ مينيسترلىگى مەن مەملەكەتتىك قىزمەت ىستەرى اگەنتتىگى ۇيىمداستىردى.

AI Governance Cup — ۇزدىك تاجىريبەلەرمەن الماسۋعا جانە تابىستى تسيفرلىق شەشىمدەردى ەل كولەمىندە كەڭىنەن ەنگىزۋگە ارنالعان الاڭ رەتىندە قاراستىرىلعان.