مەملەكەت باسشىسى قاسىم-جومارت توقاەۆ قاراعاندى وبلىسىندا «ارسەلورميتتال تەمىرتاۋ» اكتسيونەرلىك قوعامىنا قاراستى كوستەنكو اتىنداعى شاحتادا بولعان ءورت سالدارىنان قازا تاپقان كەنشىلەردىڭ وتباسىلارى مەن تۋعان-تۋىستارىنا كوڭىل ايتتى، - دەپ حابارلادى Ras.kz پورتالى اقوردا.كز كە سىلتەمە جاساي وتىرىپ.

– مەن مەملەكەت باسشىسى رەتىندە بارشاڭىزعا كوڭىل ايتامىن. بۇل – قاسىرەت. ءبارىن تۇسىنەمىن. اپات بولدى. اپاتتىڭ كەسىرىنەن كوپتەگەن ادام قازا تاپتى. سوندىقتان بۇل جەرگە ارنايى كەلدىم. ءتيىستى شارالار قابىلدايمىز، سونىڭ ىشىندە زارداپ شەككەندەردىڭ وتباسىلارىنا كومەك كورسەتەمىز. قازا تاپقاندار مەن زارداپ شەككەندەردىڭ وتباسىلارى ەشقانداي مۇقتاجدىق كورمەۋى ءۇشىن ۇكىمەت، اكىمدىك جانە قايىرىمدىلىق ۇيىمدارىنىڭ الدىندا جان-جاقتى كومەك كورسەتۋ مىندەتى تۇر، – دەدى پرەزيدەنت.

مەملەكەت باسشىسى بۇكىل ەلىمىز بويىنشا 29 قازان جالپىۇلتتىق ازا تۇتۋ كۇنى بولىپ جاريالاناتىنىن جانە «ارسەلورميتتال تەمىرتاۋ» كومپانياسىنا قاتىستى ءتيىستى شارا قابىلداناتىنىن جەتكىزدى.

– ەرتەڭ بۇكىل ەلىمىز بويىنشا جالپىۇلتتىق ازا تۇتۋ كۇنى جاريالانادى. مەن «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ جونىندە تاپسىرما بەردىم. بۇل مەكەمە ۇكىمەتپەن جانە كاسىپورىنمەن ىنتىماقتاستىق تۇرعىسىنان ءبىزدىڭ تاريحىمىزداعى ەڭ ناشار كومپانيا بولدى. ەندى كاسىپورىننىڭ وزىنە قاتىستى شارالار قابىلداۋ تۋرالى ويلانۋىمىز كەرەك. باسين ۆاديم بوريسوۆيچ دەگەن ازامات بار. سىزدەر ونى بىلەسىزدەر. ول ءبىر كەزدەرى «ارسەلورميتتالدا» جۇمىس ىستەگەن. وبلىس اكىمىنىڭ ورىنباسارى بولدى. مەن وعان قايتىپ كەلىپ، كاسىپورىندى باسقارۋدى تاپسىرامىن. كاسىپورىننىڭ قازىرگى باسشىلىعىنىڭ قولىنان ەشتەڭە كەلمەيدى، – دەدى قاسىم-جومارت توقاەۆ.

مەملەكەت باسشىسىنىڭ ايتۋىنشا، جەر استىندا قالعان كەنشىلەردى قۇتقارۋ، زارداپ شەككەن جانە قازا بولعان ازاماتتاردىڭ وتباسىلارىنا جان-جاقتى كومەك كورسەتۋ – كەزەك كۇتتىرمەيتىن مىندەت.

– ەڭ الدىمەن، قۇتقارۋ جۇمىستارى جۇرگىزىلەدى. ەكىنشىدەن، زارداپ شەككەندەر مەن مەديتسينالىق كومەككە مۇقتاج ازاماتتاردىڭ ناقتى سانىن انىقتاۋىمىز كەرەك. ۇشىنشىدەن، وسى اپاتتان زارداپ شەككەندەردىڭ بارلىعىنىڭ وتباسىنا ماتەريالدىق كومەك كورسەتەمىز. ەگەر قاجەت بولسا، ارنايى قور اشامىز. مۇنىمەن ءوزىم اينالىسامىن، – دەدى پرەزيدەنت.

سونىمەن قاتار مەملەكەت باسشىسى قازىرگى ۋاقىتتا كەنشىلەردىڭ زەينەتكە شىعۋ جاسىنا قاتىستى ماسەلە قاراستىرىلىپ جاتقانىن ايتتى.

فوتو اقوردا.كز