مەملەكەت قاسىم-جومارت توقاەۆ قاراعاندى وبلىسىنداعى «ارسەلورميتتال تەمىرتاۋ» اكتسيونەرلىك قوعامىنا قاراستى كوستەنكو اتىنداعى شاحتادا بولعان اپات سالدارىن جويۋ جونىندەگى جەدەل شتاب وتىرىسىن وتكىزدى، - دەپ حابارلايدى Ras.kz پورتالى اقوردا.كز سايتىنا سىلتەمە جاساي وتىرىپ.

ەڭ الدىمەن، قۇتقارۋ جۇمىستارىنىڭ بارىسى جانە قازىرگى احۋال تۋرالى توتەنشە جاعدايلار ءمينيسترى سىرىم ءشارىپحانوۆ باياندادى.

– اپات كەزىندە شاحتادا 252 ادام بولعان. 206 قىزمەتكەر ءوز بەتىنشە كوتەرىلدى. قازىرگى ۋاقىتتا اپاتتىق-قۇتقارۋ جۇمىستارىنا 10 بولىمشە، 55 تاۋ-كەن قۇتقارۋشى جانە 12 تەحنيكا جۇمىلدىرىلدى. جۇمىستار ەكى ءوندىرۋ ۋچاسكەسى اۋماعىندا جۇرگىزىلۋدە. جاڭا ءورت وشاقتارى بايقالمايدى. جۇمىس تاۋلىك بويى جالعاسادى، – دەدى سىرىم ءشارىپحانوۆ.

مەملەكەت باسشىسى توتەنشە جاعدايلار ءمينيسترىنىڭ بايانداماسىن تىڭداپ بولعاننان كەيىن ىزدەستىرۋ-قۇتقارۋ جۇمىستارىن بارلىق قاجەتتى كۇشتى تارتا وتىرىپ، كۇشەيتىلگەن رەجيمدە جالعاستىرۋدى تاپسىردى.

– جاڭا عانا ازاماتتار ءار 10-15 مينۋت سايىن اقپارات بەرىپ تۇرۋ ماسەلەسىن كوتەردى. مۇمكىندىگىنشە قامتاماسىز ەتۋ كەرەك. حالىقپەن قارىم-قاتىناس جاسايتىن ءبىر وكىل بولسىن. جۇرتشىلىقتى اقپاراتسىز قالدىرۋعا بولمايدى. بۇل – وتە شەتىن ءارى مۇلدەم جول بەرۋگە بولمايتىن ماسەلە. ءبىز كۇن-ءتۇن دەمەي، سوڭىنا دەيىن كۇرەسۋىمىز كەرەك، – دەدى قاسىم-جومارت توقاەۆ.

مۇنان سوڭ دەنساۋلىق ساقتاۋ ءمينيسترى اجار عينيات زارداپ شەككەن ازاماتتارعا كورسەتىلىپ جاتقان مەديتسينالىق كومەك تۋرالى مالىمەت بەردى.

– مەديتسينالىق كومەك جەدەل ءارى تولىق كورسەتىلىپ جاتىر. ءارتۇرلى دەڭگەيدە گازدان ۋلانعاندار توكسيكولوگيا بولىمشەسىندە ەم الۋدا. مەديتسينالىق كومەك كورسەتۋگە بارلىق دارىگەر جۇمىلدىرىلدى، – دەدى اجار عينيات.

سونىمەن قاتار ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازا تاپقان كەنشىلەردىڭ وتباسىلارىنا قانداي الەۋمەتتىك كومەك كورسەتىلەتىنىن ايتتى.

– قازا تاپقان ازاماتتاردىڭ وتباسىلارىنا اسىراۋشىسىنان ايرىلۋىنا بايلانىستى جاردەماقى تاعايىندالادى. ول رەسپۋبليكالىق بيۋدجەتتەن، الەۋمەتتىك ساقتاندىرۋ قورىنان جانە ءومىردى ساقتاندىرۋ كومپانياسىنان تولەنەدى. جاردەماقى كولەمىنىڭ جالپى ورتاشا مولشەرى اسىراۋىنداعى ادامدار 18 جاسقا تولعانعا دەيىن اي سايىن 400-500 مىڭ تەڭگەدەن باستالادى. ەگەر بالالار جوعارى وقۋ ورىندارىندا ءبىلىم الىپ جاتقان بولسا، وندا 23 جاسقا دەيىن تولەنەدى. ازىرگە بارلىق تولەمدى وتەۋ «ارسەلورميتتال تەمىرتاۋ» كومپانياسىنا جۇكتەلەدى. كاسىپورىن ۇجىمدىق شارتقا سايكەس جىلدىق تولەم تاۋەكەلدەرىن تولەۋگە مىندەتتى. «ارسەلورميتتال تەمىرتاۋ» كومپانياسى جەرلەۋ راسىمدەرىنە بايلانىستى بارلىق شىعىندى، سونداي-اق بالالاردى جوعارى وقۋ ورىندارىندا وقىتۋدى ءوز موينىنا الۋعا ءتيىس، – دەدى سۆەتلانا جاقىپوۆا

پرەمەر-مينيستر ءاليحان سمايىلوۆ ۇكىمەت «ارسەلورميتتال تەمىرتاۋ» كومپانياسىنىڭ اكتسيونەرلەرىمەن الدىن الا ۋاعدالاستىققا قول جەتكىزگەنىن جانە كاسىپورىنعا تيەسىلى مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ جونىندەگى مامىلەنى رەسىمدەۋ پروتسەسى اياقتالۋعا جاقىن ەكەنىن باياندادى.

ۇكىمەتتىك كوميسسيا مۇشەلەرىنىڭ باياندامالارىن تىڭداعان پرەزيدەنت اپاتتى جويۋ جانە كەنشىلەردى قۇتقارۋ ءۇشىن بارلىق شارانى قابىلداۋدى، سونداي-اق قازا تاپقان جانە زارداپ شەككەن ازاماتتاردىڭ وتباسىلارىنا جان-جاقتى كومەك كورسەتۋ جونىندە تاپسىرما بەردى.

– سىزدەردىڭ مىندەتتەرىڭىز – ادامدارمەن تىكەلەي جۇمىس ىستەۋ، كەزدەسۋ، سونداي-اق جەدەل توپتى قاجەتتى قۇرال-جابدىقتارمەن قامتاماسىز ەتۋ. ءبىز قازىر قالىپتاسقان جاعدايدى ءتۇسىندىرۋ، ەڭ باستىسى، شەشىم قابىلداۋ ءۇشىن جۇمىلا جۇمىس ىستەۋىمىز كەرەك. جەرگىلىكتى اكىمدىك ءتيىستى شەشىم قابىلداۋى قاجەت. كاسىپورىننىڭ سۇرانىستارىنا سۇيەنە وتىرىپ، قاجەتتى نارسەنىڭ ءبارىن انىقتاڭىزدار. ۇكىمەتتىك كوميسسيا بارلىق ماسەلەنى پىسىقتاۋعا ءتيىس. مەن نە ىستەۋ كەرەك ەكەنىن ايتتىم. اركىم وزىنە قاتىستى جۇمىستى بىلەدى. مينيسترلەر، باسشىلار وزدەرىنىڭ جۇمىس تاسىلدەرىن ءبىلۋى كەرەك. پرەزيدەنت ءار وقيعا سايىن كەلىپ، تاپسىرما بەرەدى دەپ كۇتىپ وتىرۋعا بولمايدى. ۆاديم بوريسوۆيچ باسينگە كاسىپورىندى باسقارۋدى ءوز قولىنا الۋدى تاپسىرامىن. ۇكىمەت پەن اكىمدىككە جان-جاقتى ءتيىستى كومەك كورسەتۋدى، توتەنشە جاعدايلار مينيسترلىگىنە مۇددەلى قۇرىلىمدارمەن بىرلەسىپ، اپات سالدارىن جويۋ جانە كەنشىلەردى قۇتقارۋ ءۇشىن بارلىق شارالاردى قابىلداۋدى تاپسىرامىن. ىشكى ىستەر مينيسترلىگى زارداپ شەككەن ادامداردىڭ وتباسىلارىمەن جۇمىس ىستەۋى كەرەك. ۇكىمەتتىك كوميسسياعا ازاماتتاردىڭ قازا بولۋىنا اكەپ سوقتىرعان ءورتتىڭ ءمان-جايىن تەرگەۋدى، بارلىق كىنالىلەردى جاۋاپقا تارتۋدى تاپسىرامىن، – دەدى قاسىم-جومارت توقاەۆ.

فوتو اقوردا.كز سايتىنان