بۇگىن پرەزيدەنت ساياباعىندا 1 مامىر - قازاقستان حالقىنىڭ بىرلىگى كۇنىنە ارنالعان «بىرلىك. دوستىق. بەرەكە» اتتى مەرەكەلىك شارا ءوتتى.

ساياباقتا قولونەر شەبەرلەرىنىڭ ۇلتتىق ناقىشتاعى بۇيىمدارى مەن جاس سۋرەتشىلەردىڭ شىعارماشىلىق تۋىندىلارى قويىلعان كورمە كوپشىلىك نازارىنا ۇسىنىلدى. گۇلدەر جانە قۇستار فەستيۆالى كەلۋشىلەرگە ەرەكشە اسەر مەن كوتەرىڭكى كوڭىل-كۇي سىيلادى.

قىزىلوردا قالاسىنىڭ اكىمى نۇرجان احاتوۆ جينالعان جۇرتشىلىقتى بەيبىتشىلىكتىڭ، كەلىسىمنىڭ مەرەيلى مەيرامىمەن قۇتتىقتادى.

«مەملەكەت باسشىسىنىڭ باستاماسىمەن قولعا الىنعان «تازا قازاقستان» جالپىۇلتتىق باعدارلاماسى اياسىندا تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان جوبالار جەمىسىن بەرۋدە.

سونىڭ ءبىر ايعاعى – پرەزيدەنت ساياباعى. بۇل ورىن قىزىلوردالىقتاردىڭ ءجيى كەلىپ، جان سەرگىتەتىن جايلى مەكەنىنە اينالدى. الداعى كۇندەرى وسى اۋماقتا جىلدىڭ ءتورت مەزگىلىندە جۇمىس ىستەيتىن بالالار تىنىعۋ لاگەرى مەن بوتانيكالىق باق پايدالانۋعا بەرىلەدى. ءبىلىم مەن تاربيە، تانىم مەن تاعىلىم ۇشتاستىرىلىپ، وسكەلەڭ ۇرپاققا مول مۇمكىندىك ۇسىنىلادى.

بۇگىن، مىنە، جاڭا ساياباقتىڭ ساياسىندا حالقىمىزدىڭ رۋحاني جانە جاسامپاز قۇندىلىقتارى دارىپتەلىپ، بىرلىك كۇنى ايرىقشا اتالۋدا.

بۇل – ىنتىماق پەن دوستىقتى نىعايتاتىن مەيرام.

ءبىر ماقسات، جارقىن بولاشاق جولىندا بىرىككەن حالقىمىز ءۇشىن ايتۋلى كۇننىڭ ءباسى بيىك. ۇلت دانالىعىندا «ىرىس الدى ىنتىماق» - دەگەن تاعىلىمدى ءسوز بار.

راسىندا، ىنتىماققا ۇيىسقان جەردە ىرىس جۇرەدى. ىرىسىمىز تاسىسا، ەل ەڭسەسىن تىكتەيدى، مەملەكەتتىڭ مەرەيى ۇستەم بولادى. ءبىزدىڭ قاستەرلى قازاقستانىمىزدا بىرلىك ۇعىمى اركەز ءبىرىنشى ورىندا.

بارلىق ەتنوس وكىلدەرى ەلىمىزدەگى يگىلىكتەرگە تىلەكشى.

بۇگىندە سىر بويىنداعى 30 - دان استام ەتنوس وكىلدەرى ءوڭىرىمىزدى وركەندەتۋ جولىندا ءتۇرلى سالالاردا ەسەلى ەڭبەك ەتىپ، ايماق دامۋىنا ايرىقشا اتسالىسىپ كەلەدى.

وبلىسىمىزدا 11 ەتنومادەني بىرلەستىك پەن 9 قوعامدىق قۇرىلىم تابىستى جۇمىس جۇرگىزۋدە. قازاقستان حالقىنىڭ بىرلىگى كۇنى مەرەكەسىمەن بارشاڭىزدى تاعى دا قۇتتىقتاپ، دەندەرىڭىزگە ساۋلىق، وتباسىلارىڭىزعا اماندىق تىلەيمىن!ەگەمەن ەلىمىزدىڭ ەڭسەسى بيىك، تاۋەلسىزدىگىمىزدىڭ تۇعىرى بەرىك بولسىن!»،- دەدى قالا اكىمى.

مەرەكەلىك باعدارلاما اياسىندا ەتنوس وكىلدەرى ونەر كورسەتىپ، كورەرمەن قاۋىمعا ءان-جىردان تارتۋ ۇسىندى. ورىندالعان پاتريوتتىق شىعارمالار قوعامداعى بىرلىك پەن تاتۋلىق قۇندىلىقتارىن كەڭىنەن ناسيحاتتاپ، ماڭىزىن ايقىنداي ءتۇستى.

ايتا كەتۋ كەرەك، وتكەن جىلى قازاقستان حالقى اسسامبلەياسىنىڭ 30 جىلدىعى اياسىندا قىزىلوردا قالاسىندا «قازاتومونەركاسىپ» ۇلتتىق اتوم كومپانياسىنىڭ دەمەۋشىلىگىمەن«دوستىق ءۇيىنىڭ» جاڭا عيماراتىنىڭ ىرگەتاسى قالانعان بولاتىن.

ايماق باسشىسىنىڭ قولداۋىمەن نىسان بيىل پايدالانۋعا بەرىلىپ، وندا V ۇلتتىق قۇرىلتاي ءوتتى.

بۇگىندە «دوستىق ءۇيى» قوعامدىق كەلىسىم مەن ەتنوسارالىق تاتۋلىقتى نىعايتۋعا باعىتتالعان باستامالاردى جۇزەگە اسىراتىن ماڭىزدى رۋحاني-مادەني ورتالىققا اينالدى.

@قىزىلوردا وبلىسى اكىمىنىڭ ءباسپاسوز قىزمەتى