ەلىمىزگە مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام سالتاناتتى ءىس-شاراعا قۇرمەتتى قوناق رەتىندە قاتىستى.

مەملەكەت باسشىسى پارادتا سويلەگەن سوزىندە ۇلى جەڭىس – تاريحىمىزدىڭ اجىراماس بولىگى جانە كۇللى الەمگە ۇلكەن ساباق بولعانىن اتاپ ءوتتى.

- ءبىز ەلدىك ءۇشىن كۇرەسكەن باتىر بابالاردى ۇلىقتايمىز. وتان قورعاۋ جولىندا وپات بولعان بوزداقتارعا تاعزىم ەتەمىز. بەيبىت كۇندى قىراعى كۇزەتىپ تۇرعان ساربازدارعا قۇرمەت كورسەتەمىز،-  دەدى قاسىم-جومارت توقاەۆ.

پارادقا قازاقستان قارۋلى كۇشتەرى قۇرامىندا جانە باسقا دا قۇرىلىمداردا قىزمەت ەتەتىن 4 مىڭنان اسا ادام قاتىستى. سونداي-اق 200-دەن اسا اسكەري قارۋ-جاراق پەن تەحنيكا، 66 اسكەري اۆياتسيا ۇشاعى مەن تىكۇشاعى كورسەتىلدى.

باس الاڭعا 5 مىڭنان استام كورەرمەن جينالدى. ولاردىڭ ىشىندە سوعىس جانە تىل ارداگەرلەرى، ديپلوماتيالىق كورپۋس پەن حالىقارالىق ۇيىمداردىڭ وكىلدەرى، دەپۋتاتتار مەن قوعام قايراتكەرلەرى، ەلىمىزدىڭ ءار ايماعىنان كەلگەن دەلەگاتتار، اسكەري-پاتريوتتىق كلۋبتاردىڭ جاس ساربازدارى بار.