ءىس-شارا اياسىندا سالانىڭ 2024 جىلعى جۇمىسى قورىتىندىلاندى. بىلتىر ىشكى تۋريستەر سانى 10,5 ميلليون ادامعا جەتىپ، 2023 جىلمەن سالىستىرعاندا 900 مىڭعا ارتتى. جالپى العاندا، 2024 جىلى ەلىمىزگە 15,3 ميلليون شەتەلدىك قوناق كەلگەن. بۇل كورسەتكىشكە جۇمىس بابىمەن نەمەسە تۇراقتى تۇرۋعا كەلگەن مەيمانداردىڭ سانى كىرمەيتىنىن ايتا كەتكەن ءجون. ءبىر جىل ىشىندە 10,4 ميلليون ادام ەلدە ءبىر كۇننەن ارتىق ۋاقىت بولعان.
وتىرىس بارىسىندا ينۆەستيتسيا تارتۋ مەن تۋريستىك ينفراقۇرىلىمدى دامىتۋ ماسەلەلەرىنە ەرەكشە نازار اۋدارىلدى. سالادا نەگىزگى كاپيتالعا سالىنعان ينۆەستيتسيا كولەمى 947,5 ميلليارد تەڭگەنى قۇراپ، ورنالاستىرۋ ورىندارىنىڭ سانى 4 303-كە جەتتى. ءبىر مەزگىلدە قابىلداۋ سىيىمدىلىعى 226 مىڭنان استام توسەك-ورىنعا دەيىن ۇلعايدى.
سونىمەن قاتار جيىن بارىسىندا مەملەكەت باسشىسىنىڭ بەرگەن تاپسىرمالارىنىڭ ورىندالۋ بارىسى دا تالقىلاندى. 2025 جىلى ششۋچە-بۋراباي كۋرورتتىق ءوڭىرىن دامىتۋعا ارنالعان كەشەندى جوسپار بەكىتىلدى. جوسپار اياسىندا بيىل ايماقتا 118 ءىس-شارا ىسكە اسىرىلادى. باستى جوبالاردىڭ قاتارىندا – ينجەنەرلىك جەلىلەر، سۋ قۇبىرلارى، قۇتقارۋ ستانتسيالارى قۇرىلىسى، جاعاجايلار مەن تەمىر جول ۆوكزالداردى اباتتاندىرۋ، سونداي-اق بۋراباي كەنتىندە 1000 ورىندىق كونگرەسس-ورتالىق سالۋ بار.
بۇدان بولەك، تۋريستىك قىزمەتتەردىڭ ساپاسىن ارتتىرۋ، اگروتۋريزمدى دامىتۋ، قوناقۇيلەردىڭ جاڭا كلاسسيفيكاتسيا جۇيەسىن ەنگىزۋ جانە ماماندار دايارلاۋ ماسەلەلەرى دە كوتەرىلدى. تۇركىستان قالاسىنداعى حالىقارالىق تۋريزم جانە مەيماندوستىق ۋنيۆەرسيتەتى سالا ماماندارىن دايارلايتىن ماڭىزدى ءبىلىم بەرۋ ورتالىعىنا اينالعانى ايتىلدى. وندا قازىرگى زامانعا ساي باعدارلامالار بويىنشا 3 مىڭعا جۋىق ستۋدەنت ءبىلىم الۋدا.
«ەلىمىزدە ەكوتۋريزمدى دامىتۋعا مۇمكىندىك بەرەتىن تابيعي رەسۋرستار جەتكىلىكتى. ەكونوميكالىق ىنتىماقتاستىق جانە دامۋ ۇيىمىنىڭ ەسەبىنە سايكەس، ەكولوگيالىق تۋريزم الداعى ونجىلدىقتارداعى نەگىزگى ترەندتەردىڭ ءبىرى بولماق. سوندىقتان ءبىز بارلىق مۇددەلى تاراپتارمەن بىرلەسە وتىرىپ، باسەكەگە قابىلەتتى ءارى تۇراقتى تۋريستىك ينفراقۇرىلىم قالىپتاستىرۋىمىز قاجەت. بۇل قازاقستانعا حالىقارالىق دەڭگەيدە لايىقتى ورىن يەلەنۋگە جول اشادى»، — دەدى ەربول مىرزابوسىنوۆ.
بىرلەسكەن وتىرىس تۋريستىك سالانىڭ تۇراقتى دامۋىنا جانە قازاقستاننىڭ حالىقارالىق باسەكەگە قابىلەتتىلىگىن ارتتىرۋعا باعىتتالعان جۇيەلى باستامالاردى تالقىلاۋعا ارنالعان ماڭىزدى الاڭعا اينالدى.
ءباسپاسوز قىزمەتى
