باتىس قازاقستان وبلىسى بويىنشا قارجىلىق مونيتورينگ اگەنتتىگىنىڭ دەپارتامەنتى جۇرگىزگەن تەرگەۋ بارىسىندا ايىپتالۋشىنىڭ الەۋمەتتىك جەلىلەردە ءوزىن تابىستى كاسىپكەر رەتىندە تانىستىرىپ، ازاماتتارعا 1 100 ەۆرو مولشەرىندە قولما-قول اقشا ينۆەستيتسيالاۋ ارقىلى پاتەر ساتىپ الۋعا اقشا جيناۋ مۇمكىندىگىن ۇسىنعانى انىقتالدى.

ينۆەستيتسيالانعان سومادان جىل سايىن 20%-دان استام تابىس پەن 10 جىل ىشىندە پاتەر ساتىپ الۋ ۇسىنىلعان.

سونىمەن قاتار، ازاماتتارعا جاڭا سالىمشىلاردى تارتقان بولسا ءپاسسيۆتى تابىس الۋ مۇمكىندىگى ۇسىنىلىپ، ءاربىر تارتىلعان جارنادان 2%-دان 18%-عا دەيىن تابىس الۋ ۋادە ەتىلگەن.

ناتيجەسىندە پيراميدانىڭ ءىس-ارەكەتىنە ايىپتالۋشى 42 ادامدى تارتىپ، 56 ملن تەڭگەدەن استام شىعىن كەلتىرگەن.

قىلمىستىق ءىس اياسىندا جۇرگىزىلگەن «Follow the money» ءپرينتسيپى بويىنشا قارجىلىق تەرگەۋ ناتيجەسىندە، زاڭسىز الىنعان اقشالاي قاراجاتقا ايىپتالۋشى استاناداعى ەليتالىق تۇرعىن ءۇي كەشەنىنەن 85 ملن تەڭگەگە پاتەر ساتىپ العانى انىقتالدى. بۇل پاتەر، مۇمكىن بولاتىن تاركىلەۋدەن جاسىرۋ ماقساتىندا، سەنىمدى تۇلعاعا راسىمدەلگەن.

سوت ۇكىمىمەن ول قك 217-بابى 3-بولىگى 2-تارماعى (قارجىلىق پيراميدا قۇرۋ جانە وعان جەتەكشىلىك ەتۋ) جانە قك 218-بابى 3-بولىگى 3-تارماعى (قىلمىستىق جولمەن الىنعان اقشانى جانە باسقا مۇلىكتى زاڭداستىرۋ) بويىنشا كىنالى دەپ تانىلىپ، 5,6 جىلعا باس بوستاندىعىنان ايىرۋ جازاسى تاعايىندالدى.

قىلمىستىق جولمەن الىنعان قاراجاتقا ساتىپ الىنعان پاتەر ازاماتتىق تالاپ-ارىزدار بويىنشا كەلتىرىلگەن زياندى وتەۋگە جۇمسالدى.

قارجىلىق مونيتورينگ اگەنتتىگى 2024 جىلى 42 قارجىلىق پيراميدانى جويعانىن ايتا كەتۋ كەرەك.

سحەمالاردىڭ ۇيىمداستىرۋشىلارى سالىمشىلارعا 20 ملرد تەڭگەدەن استام زيان كەلتىرگەن. ونىڭ 13 ملرد تەڭگەدەن استامى قايتارىلىپ، 78 ادام سوتتالدى.

سونىمەن قاتار، الاياقتىق سحەمالارىن جارنامالايتىن 15 مىڭنان استام سايت پەن اككاۋنت بۇعاتتالدى، «WhatsApp»، «Telegram» جانە «Instagram» مەسسەندجەرلەرىندە 327 چات جابىلدى، بۇل 2 ميلليوننان استام ازاماتتىڭ قارجىلىق شىعىندارىنىڭ الدىن الۋعا مۇمكىندىك بەردى. ايتا كەتەيىك، اگەنتتىكتە قارجى پيراميدالارىنىڭ بەلگىلەرىن تەكسەرۋگە مۇمكىندىك بەرەتىن «Baiqa, piramida!» Telegram-بوتى ىسكە قوسۋلى.

ەگەر ءسىز نەمەسە جاقىندارىڭىز قارجى پيراميداسىنىڭ ارەكەتىنە تاپ بولسا، تۇرعىلىقتى جەرىڭىز بويىنشا ەكونوميكالىق تەرگەپ-تەكسەرۋ دەپارتامەنتىنە جۇگىنۋدى سۇرايمىز.

ازاماتتاردى ساق بولۋعا جانە كۇماندى قارجىلىق ۇيىمدارعا جيناقتارىن سالماۋعا شاقىرامىز