«ورال حالىقارالىق اۋەجايى» جشس-ءتىڭ ءباسپاسوز قىزمەتىنەن ءمالىم ەتكەندەي، شارم-ەل-شەيحكە ۇشۋدى FlyArystan اۋە كومپانياسى جۇزەگە اسىرادى.

ورال قالاسىنان تانىمال كۋرورتقا سەنبى كۇندەرى Airbus A320 اۋە كەمەلەرىمەن جەتۋگە بولادى. چارتەرلىك رەيس 160 ورىندىق اۋە كەمەسىمەن ورىندالادى. رەيستەر 2025 جىلدىڭ ناۋرىزىنا دەيىن جوسپارلانعان.

«مارشرۋتتىق جەلىنى دامىتۋ – ءبىزدىڭ اۋەجاي جۇمىسىنىڭ باسىم باعىتتارىنىڭ ءبىرى. ءبىز ءوڭىر تۇرعىندارىنا ەل ىشىندە دە، شەت ەلدەرگە دە سۇرانىسقا يە باعىتتار بويىنشا تىكەلەي رەيستەردىڭ قولجەتىمدى بولۋىن قامتاماسىز ەتۋ ءۇشىن جۇمىس ىستەپ جاتىرمىز»، - دەدى اۋەجايدىڭ باس ديرەكتورى رۋستام بەكتەمىروۆ.

قازىرگى ۋاقىتتا ورال قالاسىنان تانىمال مىسىرلىق كۋرورتقا Scat Airlines اۋە كومپانياسىنىڭ رەيستەرىمەن ۇشۋعا بولادى. سونداي-اق اۋە كومپانياسى تايلاندتىق پحۋكەتكە چارتەرلىك رەيستەرىن قايتا اشىپ جاتىر.

ەسكە سالا كەتەيىك، بۇدان بۇرىن ورالداعى مانشۇك مامەتوۆا اتىنداعى حالىقارالىق اۋەجايدىڭ جوندەلىپ جاتقانى تۋرالى اقپارات تاراعان بولاتىن.