ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ، تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى دميتري مۋن، سونداي-اق ءىت سالاسىنىڭ وكىلى الماس نۇرعاليەۆ بايانداما جاسادى.

ولجاس بەكتەنوۆ بيىلعى ءبىرىنشى توقسانىنىڭ قورىتىندىسى بويىنشا قۇرىلىس جۇمىستارىنىڭ كولەمى 1 ترلن تەڭگەدەن اسقانىن، بۇل وتكەن جىلدىڭ سايكەس كەزەڭىمەن سالىستىرعاندا 17%-عا جوعارى ەكەنىن جەتكىزدى. سونداي-اق 3,7 ملن م2 تۇرعىن ءۇي پايدالانۋعا بەرىلدى، بۇل بىلتىرعى كورسەتكىشتەن 7,5%-عا ارتىق.

"ەلىمىزدىڭ كوپتەگەن وڭىرىندە قۇرىلىس جۇمىستارىنىڭ قارقىنى ارتا تۇسكەنى بايقالادى. بۇدان سالانىڭ ورنىقتى دامۋىن كورۋگە بولادى. جالپى قۇرىلىس سەكتورى ەلىمىزدىڭ ينفراقۇرىلىمدىق نەگىزىن قالىپتاستىرادى. كوپتەگەن جۇمىس ورىندارىن قۇرىلىپ، بيزنەستىڭ دامۋىنا جانە ازاماتتاردىڭ تۇرمىس ساپاسىنا تىكەلەي اسەر ەتەدى", -  دەپ اتاپ ءوتتى پرەمەر-مينيستر.

ولجاس بەكتەنوۆ قۇرىلىستا تسيفرلىق شەشىمدەردى ەنگىزۋ قۇرىلىس جوبالارىن ىسكە اسىرۋ مەرزىمدەرىن ەداۋىر قىسقارتۋعا، شىعىنداردى جانە سىبايلاس جەمقورلىق تاۋەكەلدەرىن بارىنشا ازايتۋعا مۇمكىندىك بەرەتىنىن اتاپ ءوتتى. بۇگىندە ينجەنەرلىك ينفراقۇرىلىمنىڭ 90%-دان استامى تسيفرلاندىرىلدى. رۇقسات قۇجاتتاماسىن بەرۋ جانە جوبالاردى كەلىسۋ بويىنشا مەملەكەتتىك قىزمەتتەردى اۆتوماتتاندىرۋ ىسكە قوسىلدى. EGov پورتالى ارقىلى قول جەتكىزۋگە بولاتىن ۇلەستىك قۇرىلىستىڭ بىرىڭعاي ءتىزىلىمى قۇرىلدى.

پرەمەر-مينيستر مەملەكەت باسشىسىنىڭ تاپسىرماسى بويىنشا وسى جىلدىڭ سوڭىنا دەيىن قۇرىلىس سالاسىنىڭ قولدانىستاعى بارلىق پورتالىن بىرىڭعاي پلاتفورمادا ينتەگراتسيالايتىن، «بىرىڭعاي تەرەزە» قاعيداتى بويىنشا قالا قۇرىلىسىن جوسپارلاۋدان باستاپ نىسانداردى پايدالانۋعا بەرۋگە دەيىنگى وزەكتى اقپاراتتاردىڭ بارلىعى جيناقتالاتىن بىرىڭعاي اقپاراتتىق جۇيە ىسكە قوسىلاتىنىن اتاپ ءوتتى. وسىعان بايلانىستى جۇيەنى ىسكە قوسۋ ءۇشىن بارلىق ءوڭىر اكىمدىكتەرىنە وسى جىلعى 1 قازانعا دەيىن ينجەنەرلىك جەلىلەر سحەمالارى مەن قالا قۇرىلىسى قۇجاتتارىن تسيفرلاندىرۋدى اياقتاۋ تاپسىرىلدى.

سونداي-اق پرەمەر-مينيستر جاۋاپتى ۆەدومستۆولارعا بىرقاتار تاپسىرما بەردى. اتاپ ايتقاندا اۋىل شارۋاشىلىعى، ونەركاسىپ جانە قۇرىلىس مينيسترلىكتەرىنە، ءوڭىر اكىمدىكتەرىنە جانە «ازاماتتارعا ارنالعان ۇكىمەت» كورپوراتسياسىنا 89 قالادا ينفراقۇرىلىمدىق دەرەكتەردىڭ بىرىڭعاي گەوپورتالى ارقىلى رۇقسات قۇجاتتاماسىن بەرۋ مەن ەسكيزدىك جوبالاردى كەلىسۋدىڭ پيلوتتىق جوباسى اياسىندا انىقتالعان دەرەكتەردىڭ سايكەسسىزدىگىن جويۋ مىندەتىن جۇكتەدى.

تسيفرلىق دامۋ، ونەركاسىپ جانە قۇرىلىس مينيسترلىكتەرىنە قۇرىلىس سالاسىنداعى جي-مودۋلدەردىڭ اۋقىمىن كەڭەيتۋ بويىنشا شەشىمدەر ازىرلەۋ تاپسىرىلدى.

ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ، قالا قۇرىلىسى كاداسترى جۇيەسى ارقىلى تەحنيكالىق شارتتاردى مىندەتتى تۇردە تسيفرلىق فورماتتا بەرۋ جونىندە جۇيەلى شارالار قابىلداۋدى تاپسىرىلدى.