Önerkäsıp jäne qūrylys vise-ministrı Quandyq Qajkenov, sifrlyq damu, innovasiialar jäne aeroǧaryş önerkäsıbı vise-ministrı Dmitrii Mun, sondai-aq IT salasynyŋ ökılı Almas Nūrǧaliev baiandama jasady.
Oljas Bektenov biylǧy bırınşı toqsanynyŋ qorytyndysy boiynşa qūrylys jūmystarynyŋ kölemı 1 trln teŋgeden asqanyn, būl ötken jyldyŋ säikes kezeŋımen salystyrǧanda 17%-ǧa joǧary ekenın jetkızdı. Sondai-aq 3,7 mln m2 tūrǧyn üi paidalanuǧa berıldı, būl byltyrǧy körsetkışten 7,5%-ǧa artyq.
"Elımızdıŋ köptegen öŋırınde qūrylys jūmystarynyŋ qarqyny arta tüskenı baiqalady. Būdan salanyŋ ornyqty damuyn köruge bolady. Jalpy qūrylys sektory elımızdıŋ infraqūrylymdyq negızın qalyptastyrady. Köptegen jūmys oryndaryn qūrylyp, biznestıŋ damuyna jäne azamattardyŋ tūrmys sapasyna tıkelei äser etedı", - dep atap öttı Premer-ministr.
Oljas Bektenov qūrylysta sifrlyq şeşımderdı engızu qūrylys jobalaryn ıske asyru merzımderın edäuır qysqartuǧa, şyǧyndardy jäne sybailas jemqorlyq täuekelderın barynşa azaituǧa mümkındık beretının atap öttı. Bügınde injenerlık infraqūrylymnyŋ 90%-dan astamy sifrlandyryldy. Rūqsat qūjattamasyn beru jäne jobalardy kelısu boiynşa memlekettık qyzmetterdı avtomattandyru ıske qosyldy. EGov portaly arqyly qol jetkızuge bolatyn ülestık qūrylystyŋ bıryŋǧai tızılımı qūryldy.
Premer-ministr Memleket basşysynyŋ tapsyrmasy boiynşa osy jyldyŋ soŋyna deiın qūrylys salasynyŋ qoldanystaǧy barlyq portalyn bıryŋǧai platformada integrasiialaityn, «bıryŋǧai tereze» qaǧidaty boiynşa qala qūrylysyn josparlaudan bastap nysandardy paidalanuǧa beruge deiıngı özektı aqparattardyŋ barlyǧy jinaqtalatyn Bıryŋǧai aqparattyq jüie ıske qosylatynyn atap öttı. Osyǧan bailanysty jüienı ıske qosu üşın barlyq öŋır äkımdıkterıne osy jylǧy 1 qazanǧa deiın injenerlık jelıler shemalary men qala qūrylysy qūjattaryn sifrlandyrudy aiaqtau tapsyryldy.
Sondai-aq Premer-ministr jauapty vedomstvolarǧa bırqatar tapsyrma berdı. Atap aitqanda Auyl şaruaşylyǧy, Önerkäsıp jäne qūrylys ministrlıkterıne, öŋır äkımdıkterıne jäne «Azamattarǧa arnalǧan ükımet» korporasiiasyna 89 qalada infraqūrylymdyq derekterdıŋ bıryŋǧai geoportaly arqyly rūqsat qūjattamasyn beru men eskizdık jobalardy kelısudıŋ pilottyq jobasy aiasynda anyqtalǧan derekterdıŋ säikessızdıgın joiu mındetın jüktedı.
Sifrlyq damu, önerkäsıp jäne qūrylys ministrlıkterıne qūrylys salasyndaǧy Jİ-modulderdıŋ auqymyn keŋeitu boiynşa şeşımder äzırleu tapsyryldy.
Ūlttyq ekonomika ministrlıgıne müddelı memlekettık organdarmen bırlesıp, qala qūrylysy kadastry jüiesı arqyly tehnikalyq şarttardy mındettı türde sifrlyq formatta beru jönınde jüielı şaralar qabyldaudy tapsyryldy.
