ءىس-شاراعا پارلامەنت ءماجىلىسىنىڭ دەپۋتاتى مۇرات ابەنوۆ، جاۋاپتى سالالاردىڭ، قۇقىق قورعاۋ ورگاندارىنىڭ باسشىلارى، سالا ارداگەرلەرى مەن زيالى قاۋىم وكىلدەرى قاتىستى. ايماق باسشىسى اۋدان تۇرعىندارىن جاڭا مەكتەپتىڭ اشىلۋىمەن قۇتتىقتاپ، اتقارىلعان جۇمىستارعا توقتالدى.
«مەملەكەت باسشىسىنىڭ توراعالىعىمەن وتكەن ۇكىمەتتىڭ كەڭەيتىلگەن وتىرسىندا ءوڭىردىڭ الەۋمەتتىك-ەكونوميكالىق دامۋ قورىتىندىلارىن باياندادىم. پرەزيدەنتىمىز وبلىسىمىزدىڭ ەكونوميكالىق وسىمىنە وڭ باعاسىن بەردى. وسى جيىندا مەملەكەت باسشىسى قاسىم-جومارت كەمەلۇلى: «بيىل «جايلى مەكتەپ» ۇلتتىق جوباسى اياقتالادى. بارلىق ايماقتا زامان تالابىنا ساي تىرەك مەكتەپتەر جەلىسى قۇرىلىپ جاتىر. مەنىڭ تاپسىرماممەن ءۇش جىل ىشىندە تاعى 1300 مەكتەپ جاڭعىرتۋدان وتەدى» – دەگەن بولاتىن.
پرەزيدەنتىمىزدىڭ، ۇكىمەتتىڭ ەرەكشە قولداۋىمەن سىر وڭىرىندە بايىپتى باستامالار قولعا الىنىپ، جاسامپاز جوبالار جۇزەگە اسۋدا. ءبىز ۇرپاق ءبىلىمىن ارتتىرۋعا، قوعامدا ۇستاز بەدەلىن كوتەرۋگە اركەز مۇددەلىمىز. تۇراقتى قولداۋدىڭ ارقاسىندا ءوڭىرىمىزدىڭ ءبىلىم سالاسى تابىسقا جەتتى. ساۋلەتى جاڭارعان مەكتەپتەر بوي كوتەردى.
وتكەن جىلى ءبىلىم سالاسىنا بولىنگەن قارجى 270 ملرد تەڭگە بولسا، بيىلعى بيۋدجەتى 308 ملرد 134 ملن تەڭگەگە جەتتى، ياعني 16,9 پايىزعا ارتتى. جاڭا مەكتەپتەردىڭ اشىلۋى – جاي عانا عيماراتتاردىڭ سالىنۋى ەمەس، بۇل جاڭا داۋىردە ءبىلىم الاتىن وزات وقۋشىلارعا جاڭا مۇمكىندىكتەر سىيلاۋ.
مەملەكەت باسشىسىنىڭ باستاماسىمەن جۇزەگە اسقان «جايلى مەكتەپ» ۇلتتىق جوباسى اياسىندا وڭىردە 6 900 وقۋشىعا ارنالعان 10 مەكتەپ قۇرىلىسى باستالىپ، وبلىس ورتالىعىنداعى 900 ورىندىق العاشقى مەكتەپتى وتكەن جىلدىڭ قازان ايىندا تابىستادىق.
جىل باسىندا جاڭاقورعان اۋدانىنىڭ «جاڭارىق» اۋىلىندا، ارال قالاسىندا 300 ورىندىق، قىزىلوردا قالاسىندا 600 ورىندىق مەكتەپتەردى پايدالانۋعا بەردىك. جىل ىشىندە تاعى 5 «جايلى مەكتەپتىڭ» قۇرىلىسىن اياقتايمىز.
بۇگىن، مىنە، «سامۇرىق-قازىنا» اكتسيونەرلىك قوعامىنىڭ ۇيلەستىرۋىمەن جۇزەگە اسىرىلعان، قۇنى 4 ملرد 709 ملن تەڭگە بولاتىن 600 ورىندىق «جايلى مەكتەپتى» ەل يگىلىگىنە تابىستاۋدامىز. ءبىز بۇل ارقىلى جاڭاقورعان كەنتىندە قارقىندى ءوسىپ كەلە جاتقان «ساياجاي» شاعىن اۋدانىنداعى بالالارىمىز باراتىن مەملەكەتتىك مەكتەپتىڭ ماسەلەسىن شەشتىك. ەندى وقۋشىلارعا باسقا مەكتەپتەرگە قاتىناۋدىڭ قاجەتى جوق.
الدىمىزدا ناقتى جوسپارلارىمىز بەن باستامالارىمىز ءالى دە كوپ. ولاردى ىسكە اسىرۋ باعىتىنداعى جۇمىستارىمىزدى جالعاستىرا بەرەمىز. قۋانىشتارىڭىز قۇتتى بولسىن!» – دەدى نۇرلىبەك نالىباەۆ.
جيىندا مۇرات ابەنوۆ اۋدان تۇرعىندارىن جاڭا مەكتەپتىڭ اشىلۋىمەن قۇتتىقتاپ، قوعام قايراتكەرى، قىزىلوردا وبلىسىنىڭ قۇرمەتتى ازاماتى يبراگيم ابيبۋللاەۆ باتاسىن بەردى.
ايتا كەتەيىك، وتكەن جىلى ايماعىمىزدا 6 مەكتەپ بوي كوتەرىپ، 5 مەكتەپكە قوسىمشا عيمارات ەل يگىلىگىنە تابىستالدى. وسىلايشا ارال اۋدانى توقاباي اۋىلىنداعى №248, شيەلى كەنتىندەگى №252 جانە جانسەيىت اۋىلىنداعى №133 اپاتتى مەكتەپتەردىڭ ماسەلەسى شەشىلدى.
«قازگەرمۇناي» كومپانياسىنىڭ دەمەۋشىلىگىمەن قىزىلوردا قالاسىندا زاماناۋي ۇلگىدەگى 350 ورىندىق «وقۋشىلار سارايى»، جاڭاقورعان اۋدانىندا 200 ورىندىق «وقۋشىلار ءۇيى» مەن 50 ورىندىق «ونەر مەكتەبى» ەل يگىلىگىنە تابىستالدى. جىل ىشىندە شيەلى اۋدانىندا دا 200 ورىندىق «وقۋشىلار ءۇيى» مەن 50 ورىندىق «ونەر مەكتەبى» جۇمىسىن باستايدى.
وبلىس ورتالىعىنداعى «شىعارماشىلىق اكادەمياسى»، مۋزىكالىق كوللەدجدىڭ جاڭا عيماراتى مامىر ايىندا، دارىندى بالالارعا ارنالعان فيزيكا-ماتەماتيكا مەكتەپ-ينتەرناتى ناۋرىز ايىندا اياقتالماق.
بيىل «ءبىلىم بەرۋ ينفراقۇرىلىمىن قولداۋ قورى» ەسەبىنەن ارال اۋدانىنىڭ «جالاڭاش» اۋىلىنان 150 ورىندىق مەكتەپ سالىنادى. بىلتىر 3 ملرد 100 ملن تەڭگەگە 8 مەكتەپ عيماراتىنا كۇردەلى جوندەۋ جۇرگىزىلدى.
مەملەكەت باسشىسىنىڭ 1 300 مەكتەپتى جاڭعىرتۋ تاپسىرماسىنا سايكەس الداعى 3 جىل ىشىندە وبلىستاعى 51 مەكتەپ، ونىڭ 9-ى بيىل كۇردەلى جوندەۋدەن وتەدى.
سالتاناتتى ءىس-شارادا جاڭاقورعان اۋدانىنىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار مەن زاماناۋي ءبىلىم ورداسىنىڭ قۇرىلىسىن جۇرگىزگەن مەردىگەر مەكەمەنىڭ قىزمەتكەرلەرى ماراپاتتالدى.
