ايماق باسشىسى اۆتوموبيل جولدارىنىڭ ساپاسىنا قاتىستى تاپسىرمالار جۇكتەدى.

«وتكەن جىلى مەملەكەت باسشىسى قاسىم-جومارت كەمەلۇلى اتىراۋ قالاسىنداعى ۇلتتىق قۇرىلتايدىڭ وتىرىسىندا «اۆتوكولىك جولدارى – ەلدىڭ ەكونوميكالىق جانە الەۋمەتتىك تىنىس-تىرشىلىگىنىڭ كۇرەتامىرى. ساپالى جول جالپىۇلتتىق مىندەتكە اينالۋى كەرەك. جولدىڭ ساپاسى جاقسارماي، ەلىمىزدىڭ دامۋى تۋرالى ءسوز قوزعاۋ مۇمكىن ەمەس» دەپ اتاپ ايتتى.

بۇعان دەيىنگى جول سالاسىنا قاتىستى ماجىلىستەردە ساپاعا باسا ءمان بەرۋدى تاپسىرىپ كەلەمىن. بۇل رەتتە جول اكتيۆتەرى ۇلتتىق ساپا ورتالىعىنىڭ ءرولى ەرەكشە. ورتالىق وبلىستاعى 91 جوبادان 1884 سىناما الىپ، 138 اقاۋدى انىقتاعان. ونىڭ ىشىندە قىزىلوردا قالاسىنداعى 31 جوبادان انىقتالعان 14 اقاۋ بۇگىنگى كۇنگە دەيىن قالپىنا كەلتىرىلمەگەن. كەمشىلىكتى تۇزەتۋدى شۇعىل ارادا قولعا الىڭىزدار.

مەردىگەر مەكەمەلەر قۇرىلىس جۇمىستارىنا زاماناۋي تەحنيكا مەن تەحنولوگيالاردى پايدالانىپ، ساپالى ءارى مەرزىمىندە ورىنداۋى ءتيىس. الداعى ۋاقىتتا ساپاسىز جۇمىس ءۇشىن مەردىگەر مەكەمەلەرمەن قوسا، اۆتورلىق جانە تەحنيكالىق قاداعالاۋشىلار دا جاۋاپتى بولاتىنىن ەسكەرىڭىزدەر.

وبلىستىق جولاۋشىلار كولىگى جانە اۆتوموبيل جولدارى باسقارماسى، قىزىلوردا قالاسى جانە اۋدان اكىمدەرى بىرلەسىپ اۆتوموبيل جولدارى مەن كوشەلەردىڭ، رەكونسترۋكتسيالاۋ، جوندەۋ جۇمىستارىنىڭ ساپاسىن قاتاڭ باقىلاۋعا الىڭىزدار. بيىلعا مەجەلەنگەن جۇمىستاردىڭ ساپالى اتقارىلۋىن قامتاماسىز ەتىڭىزدەر», – دەدى ن.نالىباەۆ.

وبلىس اۋماعىنداعى جەرگىلىكتى ماڭىزى بار اۆتوموبيل جولدارىنىڭ ۇزىندىعى 3545 شاقىرىم، ونىڭ 1025 شاقىرىمى – رەسپۋبليكالىق، 555 شاقىرىمى – وبلىستىق، 1965 شاقىرىمى – اۋداندىق ماڭىزى بار اۆتوموبيل جولدارى.

بىلتىر 300 شاقىرىمنان استام جول جوندەۋدەن ءوتىپ، جاقسى جاعدايداعى جولدار ۇلەسى 92 پايىزعا جەتتى. بيىل رەسپۋبليكالىق جانە وبلىستىق بيۋدجەتتەن بولىنىگەن قارجىعا 329 شاقىرىم جولدار مەن كوپىرلەردى جوندەۋ جوسپارلانۋدا. بۇل ارقىلى جاقسى جاعدايداعى جولدار ۇلەسى 95 پايىزعا جەتكىزىلمەك.