مەملەكەت باسشىسىنىڭ مەملەكەتتىك بيۋدجەتتى ءتيىمدى پايدالانۋ تاپسىراماسى اياسىندا، قارجىلىق مونيتورينگ اگەنتتىگى ينفراقۇرىلىمدىق جانە الەۋمەتتىك جوبالاردى ىسكە اسىرۋ بارىسىندا ارتىق شىعىندار تاۋەكەلدەرىن بارىنشا ازايتۋ جونىندەگى جۇمىستى جۇرگىزۋدە. اتالعان جۇمىس جەرگىلىكتى اتقارۋشى ورگاندارمەن جانە كۆازيمەملەكەتتىك سەكتور وكىلدەرىمەن بىرلەسىپ جۇزەگە اسىرىلۋدا. اعىمداعى جىلدىڭ قاڭتار ايىنان باستاپ 34 جوبا بويىنشا 79 ملرد تەڭگەدەن استام سوماعا بيۋدجەت قاراجاتىنىڭ شىعىندارى قىسقارتىلدى. ماسەلەن، قاراعاندى وبلىسىندا «قاراعاندى سۋ» جشس نەگىزگى سۋ تازارتۋ قۇرىلىستارىنىڭ بلوكتارىن قايتا جاڭارتۋ» جوباسىنىڭ جسق ازىرلەۋ ساتىسىندا قۇبىرلاردىڭ 5 ءتۇرىنىڭ قۇنى ارتىق جوبالانعانى انىقتالدى.

بىرلەسكەن جۇمىس قورىتىندىسى بويىنشا جوبانىڭ مالىمدەلگەن سمەتالىق قۇنى 23 ملرد تەڭگەدەن 16,8 ملرد تەڭگەگە دەيىن تومەندەتىلدى، ناتيجەسىندە 6,1 ملرد تەڭگە ۇنەمدەلدى.

سول سەكىلدى، «جايلى مەكتەپ» ۇلتتىق جوباسىن تالداۋ بارىسىندا ءوندىرۋشى نەمەسە ولاردىڭ ديستريبيۋتورلارى بولىپ تابىلمايتىن جەتكىزۋشىلەردىڭ ۇسىنىستارى نەگىزىندە ينتەراكتيۆتى سەنسورلىق پانەلدىڭ قۇنىن ارتتىرۋ فاكتىسى انىقتالدى.

اگەنتتىك «قازقسعزي» اق-مەن ءوزارا ءىس-قيمىل ناتيجەسىندە پانەلدەردىڭ باعاسى نارىقتىق دەڭگەيگە دەيىن تومەندەتىلدى، بۇل 14 ملرد تەڭگە مولشەرىندە ارتىق شىعىنتاردىڭ الدىن الۋعا مۇمكىندىك بەردى.

قما بۇل باعىتتاعى جۇمىستى ەلىمىزدىڭ بارلىق وڭىرلەرىندە جۇرگىزۋدە.

ايتا كەتەيىك، قارجىلىق مونيتورينگ اگەنتتىگىنىڭ قىلمىستىق ىسكە جەتكىزبەي، ەرتە ساتىدا ۇرلىق تاۋەكەلدەرىن بولدىرماۋ ارقىلى كولەڭكەلى ەكونوميكاعا قارسى ءىس-قيمىل پريزماسى ارقىلى مەملەكەت پەن ادال بيزنەستىڭ مۇددەلەرىن قورعاۋعا باعىتتالعان.