قر تۋريزم جانە سپورت ۆيتسە-ءمينيسترى ميراس تولەباەۆ شىعىس قازاقستان وبلىسىنىڭ تۇرعىندارىمەن كەزدەستى. جيىنعا وبلىس اكىمىنىڭ ورىنباسارى رەنات قۇرمانباەۆ، جەرگىلىكتى اتقارۋشى ورگانداردىڭ وكىلدەرى، تۋريزم سالاسىنداعى كاسىپكەرلەر، سپورتشىلار مەن جاتتىقتىرۋشىلار قاتىستى.

كەزدەسۋدە تۋريزم جانە سپورت ينفراقۇرىلىمىن دامىتۋ، ينۆەستيتسيا تارتۋ، بالالار مەن جاسوسپىرىمدەر جانە بۇقارالىق سپورتتى قولداۋ، سونداي-اق ءوڭىردىڭ تۋريستەر ءۇشىن تارتىمدىلىعىن ارتتىرۋ ماسەلەلەرى ايتىلدى.

«شىعىس قازاقستاننىڭ تابيعاتى ەرەكشە، سپورتتاعى ءداستۇرى باي. ءبىزدىڭ مىندەتىمىز — وسى الەۋەتتى ءتيىمدى پايدالانىپ، ينفراقۇرىلىمدى دامىتۋ، ينۆەستيتسيا تارتۋ، دەمالۋعا جانە سپورتپەن شۇعىلدانۋعا قولايلى جاعداي جاساۋ. ىسكە اسىرىلىپ جاتقان جوبالاردىڭ يگىلىگىن ءوڭىر تۇرعىندارى كورۋى كەرەك»، — دەدى ميراس تولەباەۆ.

2026 جىلدىڭ ءبىرىنشى جارتىجىلدىعىندا وبلىستىڭ ورنالاستىرۋ ورىندارى 189 مىڭ ىشكى جانە 6,7 مىڭ شەتەلدىك تۋريستكە قىزمەت كورسەتتى. توعىز ايدا تۋريزم سالاسىنا 11,8 ملرد تەڭگە ينۆەستيتسيا تارتىلدى.

وڭىردە جاڭا تۋريستىك جوبالار جۇزەگە اسىرىلىپ جاتىر. بيىل Monotel قوناقۇي كەشەنى مەن Ular Park كاپسۋلالىق قوناقۇيى اشىلدى. 218 ورىندىق Wellness Resort شيپاجايىنىڭ قۇرىلىسى ءجۇرىپ جاتىر. Forest Hills جانە «التاي ءالپىسى» كۋرورتتارىنىڭ تاۋ شاڭعىسى ينفراقۇرىلىمى دامىتىلۋدا.

وبلىستا 1 658 سپورت نىسانى جۇمىس ىستەيدى. مىڭنان استامى اۋىلدىق جەرلەردە ورنالاسقان. دەنە شىنىقتىرۋمەن جانە سپورتپەن تۇراقتى اينالىساتىن تۇرعىندار سانى 314 مىڭ ادامعا جەتتى. بۇل — وبلىس حالقىنىڭ 45 پايىزى.

بيىل اينابۇلاق جانە جارسۋ اۋىلدارىندا مودۋلدىك سپورت نىساندارى اشىلدى. التى ەلدى مەكەندە دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى جالعاسىپ جاتىر. وسكەمەندە يپپودروم مەن ۆولەيبول ورتالىعىن سالۋ جوبالارى جۇزەگە اسىرىلۋدا. سونداي-اق جابىق فۋتبول ستاديونىن سالۋ جوسپارلانىپ وتىر.

كەزدەسۋ سوڭىندا تۇرعىندار ءتۋريزمدى دامىتۋ، مەملەكەتتىك قولداۋ، سپورت نىساندارىن سالۋ جانە بالالاردىڭ سپورتپەن اينالىسۋىنا جاعداي جاساۋ جونىندە سۇراقتار قويدى. كوتەرىلگەن ماسەلەلەر بويىنشا ءتيىستى تۇسىنىكتەمەلەر بەرىلدى.

تۋريزم جانە سپورت مينيسترلىگى