QR Turizm jäne sport vise-ministrı Miras Tölebaev Şyǧys Qazaqstan oblysynyŋ tūrǧyndarymen kezdestı. Jiynǧa oblys äkımınıŋ orynbasary Renat Qūrmanbaev, jergılıktı atqaruşy organdardyŋ ökılderı, turizm salasyndaǧy käsıpkerler, sportşylar men jattyqtyruşylar qatysty.
Kezdesude turizm jäne sport infraqūrylymyn damytu, investisiia tartu, balalar men jasöspırımder jäne būqaralyq sportty qoldau, sondai-aq öŋırdıŋ turister üşın tartymdylyǧyn arttyru mäselelerı aityldy.
«Şyǧys Qazaqstannyŋ tabiǧaty erekşe, sporttaǧy dästürı bai. Bızdıŋ mındetımız — osy äleuettı tiımdı paidalanyp, infraqūrylymdy damytu, investisiia tartu, demaluǧa jäne sportpen şūǧyldanuǧa qolaily jaǧdai jasau. Iske asyrylyp jatqan jobalardyŋ igılıgın öŋır tūrǧyndary köruı kerek», — dedı Miras Tölebaev.
2026 jyldyŋ bırınşı jartyjyldyǧynda oblystyŋ ornalastyru oryndary 189 myŋ ışkı jäne 6,7 myŋ şeteldık turistke qyzmet körsettı. Toǧyz aida turizm salasyna 11,8 mlrd teŋge investisiia tartyldy.
Öŋırde jaŋa turistık jobalar jüzege asyrylyp jatyr. Biyl Monotel qonaqüi keşenı men Ular Park kapsulalyq qonaqüiı aşyldy. 218 oryndyq Wellness Resort şipajaiynyŋ qūrylysy jürıp jatyr. Forest Hills jäne «Altai Alpısı» kurorttarynyŋ tau şaŋǧysy infraqūrylymy damytyluda.
Oblysta 1 658 sport nysany jūmys ısteidı. Myŋnan astamy auyldyq jerlerde ornalasqan. Dene şynyqtyrumen jäne sportpen tūraqty ainalysatyn tūrǧyndar sany 314 myŋ adamǧa jettı. Būl — oblys halqynyŋ 45 paiyzy.
Biyl Ainabūlaq jäne Jarsu auyldarynda moduldık sport nysandary aşyldy. Alty eldı mekende dene şynyqtyru-sauyqtyru keşenderınıŋ qūrylysy jalǧasyp jatyr. Öskemende ippodrom men voleibol ortalyǧyn salu jobalary jüzege asyryluda. Sondai-aq jabyq futbol stadionyn salu josparlanyp otyr.
Kezdesu soŋynda tūrǧyndar turizmdı damytu, memlekettık qoldau, sport nysandaryn salu jäne balalardyŋ sportpen ainalysuyna jaǧdai jasau jönınde sūraqtar qoidy. Köterılgen mäseleler boiynşa tiıstı tüsınıktemeler berıldı.
Turizm jäne sport ministrlıgı
