كەزدەسۋ بارىسىندا قر پرەزيدەنتى قاسىم-جومارت توقاەۆ پەن رف پرەزيدەنتى ۆلاديمير پۋتين اراسىندا ەكىجاقتى ساۋدا كولەمىن ارتتىرۋ بويىنشا قول جەتكىزىلگەن ۋاعدالاستىقتاردى ىسكە اسىرۋ ماسەلەلەرى تالقىلاندى.
ەكى ەل اراسىنداعى ساۋدا-ەكونوميكالىق، عىلىمي-تەحنيكالىق جانە مادەني-گۋمانيتارلىق ىنتىماقتاستىقتى كەڭەيتۋ جوسپارلارى قارالدى. ونەركاسىپ كووپەراتسياسى، اۋىل شارۋاشىلىعى، ەنەرگەتيكا، كولىك ونەركاسىبى جانە باسقا دا سالالارداعى ءوزارا ءىس-قيمىلدى نىعايتۋ جونىندەگى مىندەتتەردى جۇزەگە اسىرۋعا نازار اۋدارىلدى.
رەسەي – قازاقستاننىڭ باستى ساۋدا سەرىكتەستەرىنىڭ ءبىرى. وتكەن جىلدىڭ 11 ايىندا ءوزارا ساۋدا كولەمى $24,2 ملرد-قا جەتتى. ەكى مەملەكەت باسشىلارى اراسىنداعى تاۋار اينالىمىن $30 ملرد-قا دەيىن جەتكىزۋ جونىندەگى ۋاعدالاستىقتارىنا قول جەتكىزۋ ماقساتىندا تاسىمالداناتىن تاۋارلار اتالىمىن كەڭەيتۋ ماڭىزدى. ەكونوميكالىق ىنتىماقتاستىقتىڭ 2021-2025 جىلدارعا ارنالعان كەشەندى باعدارلاماسىن ىسكە اسىرۋدىڭ وڭ ناتيجەلەرى اتاپ ءوتىلىپ، الداعى كەزەڭگە جاڭارتىلعان باعدارلامانى ازىرلەۋ قاجەتتىگى ناقتىلاندى.
2024 جىلعى 10 ايدىڭ قورىتىندىسى بويىنشا اۋىل شارۋاشىلىعى ونىمدەرىنىڭ اينالىمى 5%-عا ءوسىپ، $3,2 ملرد-تان استى.
ونەركاسىپ كووپەراتسياسى سالاسىندا بۇگىنگى تاڭدا $18,6 ملرد-قا قازاق-رەسەيلىك 99 جوبا ىسكە اسىرىلدى. قازاقستاندا جاڭا بىرلەسكەن جوبالاردى جۇزەگە اسىرۋ پەرسپەكتيۆالارى قارالدى.
قازاقستان ارقىلى ترانزيتتىك تاسىمالداۋ جوعارى قارقىنمەن دامىپ كەلەدى. وسىعان بايلانىستى اۆتوكولىك جانە تەمىرجول ينفراقۇرىلىمىن دامىتۋعا، سونداي-اق سۋ كولىگى سالاسىندا جاڭا بالامالى باعىتتار اشۋعا كوڭىل بولىنۋدە.
«مەملەكەت باسشىلارى قاسىم-جومارت توقاەۆ پەن ۆلاديمير ءپۋتيننىڭ بىرلەسكەن كۇش-جىگەرىنىڭ ارقاسىندا ەكىجاقتى ىنتىماقتاستىعىمىز ساپالى جاڭا دەڭگەيگە كوتەرىلدى. ماڭىزدى مىندەت – جوعارى دەڭگەيدە قول جەتكىزىلگەن ۋاعدالاستىقتاردىڭ ءىس جۇزىندە ورىندالۋىن قامتاماسىز ەتۋ. قازاقستان ۇكىمەتى تىعىز ءوزارا ءىس-قيمىل جاساۋعا جانە بارلىق سالادا ىنتىماقتاستىقتى دامىتۋعا دايىن», — دەپ اتاپ ءوتتى ولجاس بەكتەنوۆ.
«قازاقستان – ءبىزدىڭ ستراتەگيالىق سەرىكتەسىمىز ءارى وداقتاسىمىز. ءبىزدىڭ قارىم-قاتىناسىمىز دوستىق، تاتۋ كورشىلىك، ءوزارا سىيلاستىق جانە ءبىر-ءبىرىنىڭ مۇددەلەرىن ەسكەرۋ قاعيداتتارىنا نەگىزدەلگەن. ۆلاديمير ءپۋتيننىڭ قازاقستانعا مەملەكەتتىك ساپارى بارىسىندا قارىم-قاتىناستارىمىزدى ودان ءارى دامىتۋ جونىندە ماڭىزدى ۋاعدالاستىقتارعا قول جەتكىزىلدى. ەكى ەل ۇكىمەتتەرىنىڭ مىندەتى -- كوشباسشىلارىمىز قول جەتكىزگەن كەلىسىمدەردىڭ مۇلتىكسىز ورىندالۋىن قامتاماسىز ەتۋ», — دەپ اتاپ ءوتتى ميحايل ميشۋستين.
كەلىسسوزدەر ناتيجەسىندە تاراپتار ستراتەگيالىق ارىپتەستىكتى نىعايتۋعا جانە بارلىق باعىت بويىنشا بىرلەسكەن جۇمىستى جالعاستىرۋعا ۋاعدالاستى.
اقپارات: primeminister.kz
