قاسىم-جومارت توقاەۆ ادىلبەك كاسىماليەۆتى قىرعىز رەسپۋبليكاسى مينيسترلەر كابينەتىنىڭ توراعاسى لاۋازىمىنا تاعايىندالۋىمەن قۇتتىقتاپ، ونىڭ استاناعا جاساعان العاشقى رەسمي ساپارى باۋىرلاس حالىقتار اراسىنداعى دوستىق پەن وداقتاستىق قاتىناستاردى نىعايتۋ تۇرعىسىنان ايرىقشا ماڭىزدى ەكەنىنە نازار اۋداردى.
– قازىرگى تاڭدا قازاق-قىرعىز ىنتىماقتاستىعى قارقىندى دامىپ جاتقانىن ەرەكشە اتاپ وتكىم كەلەدى. قۇرمەتتى سادىر نۋرگوجوەۆيچ جاپاروۆتىڭ قازاقستانعا بىلتىر جاساعان رەسمي ساپارى ەكىجاقتى ىقپالداستىعىمىزدى جاڭا دەڭگەيگە كوتەردى. وسى ءساتتى پايدالانىپ، قۇرمەتتى سادىر نۋرگوجوەۆيچكە جىلى لەبىزىمدى جەتكىزۋىڭىزدى سۇرايمىن، – دەدى مەملەكەت باسشىسى.
پرەزيدەنتتىڭ ايتۋىنشا، ەكى ەل ۇكىمەتتەرىنە جۇكتەلگەن باستى مىندەتتەردىڭ ءبىرى – جوعارى دەڭگەيدە قول جەتكىزىلگەن ۋاعدالاستىقتاردىڭ تولىقتاي جۇزەگە اسىرىلۋىن باقىلاۋ. اتاپ ايتقاندا، تاۋار اينالىمىنىڭ كولەمىن ۇلعايتۋ ءۇشىن جاڭا مۇمكىندىكتەر ىزدەۋ، قازاق-قىرعىز شەكاراسىنداعى يندۋستريالدى ساۋدا-لوگيستيكالىق كەشەندى جەدەل ىسكە قوسۋعا ىقپال ەتۋ، سونداي-اق كولىك-ترانزيت بايلانىسى ءۇشىن قولايلى جاعداي جاساۋ قاجەت.
ءوز كەزەگىندە ادىلبەك كاسىماليەۆ قىرعىز دەلەگاتسياسىنا قازاق جەرىندە كورسەتىلگەن قوناقجايلىققا ريزاشىلىعىن ءبىلدىرىپ، پرەزيدەنت سادىر جاپاروۆتىڭ ىزگى سالەمى مەن تىلەگىن جەتكىزدى.
– ءبىزدىڭ پرەزيدەنتىمىز باۋىرلاس قازاقستانمەن دوستىق جانە تاتۋ كورشىلىك قارىم-قاتىناستى ءاردايىم ارتتىرۋعا زور ءمان بەرىپ، قولداۋ ءبىلدىرىپ كەلەدى. جوعارى دەڭگەيدەگى كەزدەسۋلەردە قول جەتكىزىلگەن كەلىسىمدەردىڭ ارقاسىندا قىرعىزستان مەن قازاقستان اراسىنداعى ساياسي، ساۋدا-ەكونوميكالىق، سۋ-ەنەرگەتيكالىق، مادەني-گۋمانيتارلىق جانە باسقا دا سالالارداعى ىنتىماقتاستىق نىعايا ءتۇستى، – دەدى قىرعىزستان ۇكىمەتىنىڭ باسشىسى.
ادىلبەك كاسىماليەۆ مەملەكەتتەر باسشىلارى قويعان بارلىق مىندەت قازاقستاندىق ارىپتەستەرمەن بىرگە مۇقيات پىسىقتالىپ جاتقانىن ايتتى.
كەزدەسۋدە بىرلەسكەن ينۆەستيتسيالىق جوبالاردى ىسكە اسىرۋ جانە سۋ-ەنەرگەتيكا سالاسىنداعى ىقپالداستىق ماسەلەلەرىنە ايرىقشا ءمان بەرىلدى.
