Qasym-Jomart Toqaev Adylbek Kasymalievtı Qyrǧyz Respublikasy Ministrler kabinetınıŋ töraǧasy lauazymyna taǧaiyndaluymen qūttyqtap, onyŋ Astanaǧa jasaǧan alǧaşqy resmi sapary bauyrlas halyqtar arasyndaǧy dostyq pen odaqtastyq qatynastardy nyǧaitu tūrǧysynan airyqşa maŋyzdy ekenıne nazar audardy.

– Qazırgı taŋda qazaq-qyrǧyz yntymaqtastyǧy qarqyndy damyp jatqanyn erekşe atap ötkım keledı. Qūrmettı Sadyr Nurgojoevich Japarovtyŋ Qazaqstanǧa byltyr jasaǧan resmi sapary ekıjaqty yqpaldastyǧymyzdy jaŋa deŋgeige köterdı. Osy sättı paidalanyp, qūrmettı Sadyr Nurgojoevichke jyly lebızımdı jetkızuıŋızdı sūraimyn, – dedı Memleket basşysy.

Prezidenttıŋ aituynşa, ekı el ükımetterıne jüktelgen basty mındetterdıŋ bırı – joǧary deŋgeide qol jetkızılgen uaǧdalastyqtardyŋ tolyqtai jüzege asyryluyn baqylau. Atap aitqanda, tauar ainalymynyŋ kölemın ūlǧaitu üşın jaŋa mümkındıkter ızdeu, qazaq-qyrǧyz şekarasyndaǧy İndustrialdy sauda-logistikalyq keşendı jedel ıske qosuǧa yqpal etu, sondai-aq kölık-tranzit bailanysy üşın qolaily jaǧdai jasau qajet.

Öz kezegınde Adylbek Kasymaliev qyrǧyz delegasiiasyna qazaq jerınde körsetılgen qonaqjailyqqa rizaşylyǧyn bıldırıp, Prezident Sadyr Japarovtyŋ ızgı sälemı men tılegın jetkızdı.

– Bızdıŋ Prezidentımız bauyrlas Qazaqstanmen dostyq jäne tatu körşılık qarym-qatynasty ärdaiym arttyruǧa zor män berıp, qoldau bıldırıp keledı. Joǧary deŋgeidegı kezdesulerde qol jetkızılgen kelısımderdıŋ arqasynda Qyrǧyzstan men Qazaqstan arasyndaǧy saiasi, sauda-ekonomikalyq, su-energetikalyq, mädeni-gumanitarlyq jäne basqa da salalardaǧy yntymaqtastyq nyǧaia tüstı, – dedı Qyrǧyzstan Ükımetınıŋ basşysy.

Adylbek Kasymaliev memleketter basşylary qoiǧan barlyq mındet qazaqstandyq ärıptestermen bırge mūqiiat pysyqtalyp jatqanyn aitty.

Kezdesude bırlesken investisiialyq jobalardy ıske asyru jäne su-energetika salasyndaǧy yqpaldastyq mäselelerıne airyqşa män berıldı.