پرەزيدەنت قاسىم-جومارت توقاەۆقا ەلدەگى كريمينوگەندىك احۋال جانە ىشكى ىستەر ورگاندارىنىڭ الدىنا قويىلعان مىندەتتەردىڭ ورىندالۋى جونىندە باياندالدى.
مەملەكەت باسشىسىنا 2026 جىلدىڭ العاشقى بەس ايىنىڭ قورىتىندىسى بويىنشا تىركەلگەن قىلمىس سانى بىلتىرعى كەزەڭمەن سالىستىرعاندا 9 پايىزعا تومەندەگەنى ايتىلدى. نەگىزگى ساناتتار بويىنشا قۇقىقبۇزۋشىلىقتىڭ ازايۋى جانە قىلمىستى اشۋ دەڭگەيىنىڭ ارتۋى بايقالادى.
الدىن الۋ ءىس-شارالارى مەن قوعامدىق قاۋىپسىزدىكتى ساقتاۋ ماسەلەسىنە ەرەكشە نازار اۋدارىلىپ وتىر.
ۆەدومستۆو جازانىڭ بۇلتارتپاس قاعيداتىن دايەكتى تۇردە قامتاماسىز ەتىپ كەلەدى. ەسەپتى كەزەڭدە وتكەن جىلدارى جاسالعان 1685 قىلمىس اشىلعان. سوت تورەلىگىنەن جاسىرىنىپ جۇرگەن 574 قىلمىسكەر، ونىڭ ىشىندە 89-ى شەتەلدەن تابىلدى.
مينيستر مەملەكەت باسشىسىنا كيبەرقىلمىسقا، ەسىرتكى قىلمىسىنا، ۇيىمداسقان قىلمىسقا جانە ەكسترەميزمگە قارسى كۇرەس ناتيجەلەرى جونىندە اقپارات بەردى. قىلمىستىق توپتاردىڭ جولىن كەسۋ، ازاماتتاردى قاۋىپ-قاتەرلەردەن قورعاۋ، سونداي-اق قاۋىپسىزدىك سالاسىنداعى حالىقارالىق ىنتىماقتاستىقتى نىعايتۋ بويىنشا كەشەندى ءىس-شارالار قولعا الىنعان.
كەزدەسۋ سوڭىندا مەملەكەت باسشىسى ەلدەگى قوعامدىق قاۋىپسىزدىك پەن قۇقىقتىق جۇيەنى قامتاماسىز ەتۋ ءۇشىن «زاڭ مەن ءتارتىپ» قاعيداتىن ناقتى جۇزەگە اسىرۋ جونىندە بىرقاتار تاپسىرما جۇكتەدى.
