شاراعا جۋرناليست ماحات سادىق، ۋنيۆەرسيتەتتىڭ «جۋرناليستيكا جانە ساياساتتانۋ» فاكۋلتەتىنىڭ دەكانى قايرات ساق، كافەدرا مەڭگەرۋشىسى سەرىكزات دۇيسەنعازى جانە وقىتۋشى-پروفەسسورلار، ستۋدەنتتەر قاتىستى.

 الاشتانۋشى - عالىم قايرات ساق:  «... نۇرجان جالاۋقىزىنىڭ بۇل ەڭبەگىنىڭ سالماعى سول، مۇندا تۇتاستاي ءبىر كەزەڭنىڭ تاريحى قامتىلعان. كىتاپتاعى سۇقباتتار مەن پىكىرلەردەن جۋرناليستەر، اسىرەسە، بۇگىنگى جاستار كوپ دۇنيە الادى. باستىسى، پراكتيكالىق ەڭبەك بۇل» ، - دەپ مەيمانعا ءسوز كەزەگىن ۇسىندى.

راسىندا، كەزدەسۋدى ۇيىمداستىرۋعا مۇرىندىق بولىپ وتىرعان ۋنيۆەرسيتەت باسشىلىعىنا العىسىم ەرەكشە دەپ ءسوز باستاعان نۇرجان جالاۋقىزى جاستارعا قاراتا: « ... ادامنىڭ ومىرگە ءساتتى قادام باسىپ، العا جىلجۋى ءۇشىن ونىڭ ورتاسى دۇرىس بولۋى كەرەك. جۇمىس بارىسىندا قيىندىق ارينە بولادى. قيىندىقسىز ءومىر جوق. كەز كەلگەن كەدەرگىگە قيىندىق دەپ قارايتىن بولساڭىز، شەشە المايسىز. سوندىقتان، ءاربىر قيىندىقتى مۇمكىندىك دەپ قابىلداۋىمىز كەرەك. كەز كەلگەن پروبلەمانىڭ شەشىمى بولادى. مەن «الماتى» تەلەارناسىن باسقارعان جىلدارى «شەشىمى بار» اتتى جوبا جاسادىق. ءالى كۇنگە دەيىن ەفيردەن ءوتىپ جاتىر. مەن بارلىق ارىپتەستەرىمە ايتاتىنمىن. كەز كەلگەن پروبلەمانى شەشۋدىڭ جولىن قاراستىرۋىمىز كەرەك دەپ. شەشىلەدى ەبىن تاپسا دەپ. بىزگە ستۋدياعا نەبىر قيىندىققا تاپ بولعان ادامدار كەلدى. بىزدەر سولاردىڭ ارقايسىنا ەفير بارىسىندا ومىرگە دەگەن سەنىمىن جوعالتپاۋدى بويىنا سىڭىردىك. تاعدىر تاۋقىمەتىن تارتقان قانشا ازاماتتارىمىز العىسىن ءبىلدىرىپ، ريزاشىلىعىن ايتىپ جاتتى. مۇنى مەن نەگە ايتىپ وتىرمىن؟ ءومىردىڭ ءتۇرلى قالتارىستارىندا جاستار تۇيىققا تىرەلمەي، كەرىسىنشە، جارىپ شىعاتىنداي سەنىم بولۋى كەرەك. ونىڭ ۇستىنە قازىر جاستار ءۇشىن، جالپى ادامزات ءۇشىن دامۋعا دەگەن مۇمكىندىك مول» - دەپ، موتيۆاتسيالىق ويىن جەتكىزدى.

حالىقارالىق تەلەۆيدەنيە جانە راديو اكادەمياسىنىڭ اكادەميگى ماحات سادىق: « ... بۇل ەڭبەكتىڭ جاستارعا بەرەر الەۋەتى زور. ولاي دەيتىنىمىز، كىتاپتا قىزمەتكە ادالدىق، جاۋاپكەرشىلىك پەن لاۋازىمدىق ءوسۋدىڭ العىشارتتارى جاقسى كەلتىرىلگەن. ەگەر تەرەڭىرەك، ءۇڭىلىپ وقىساڭىزدار» دەدى. ءبىر سوزبەن ايتقاندا، قۇندى ەڭبەك دەپ اتاپ ءوتتى.

ستۋدەنتتەر مەيمانعا سۇراق قويىپ، ومىرلىك ازىق بولاتىن جاۋاپتار الىپ جاتتى. مەديا مەنەدجەردىڭ كەڭەسىن تىڭدادى.

نۇرجان جالاۋقىزىنىڭ ايتۋىنشا، ادام ءومىر بەلەسىنىڭ قاي كەزەڭىندە بولسا دا، ارمانداۋدى ۇمىتپاۋى كەرەك. توقتاتپاۋى كەرەك. ارمان – راسىندا ادامدى العا جەتەلەيدى. اسىرەسە، جاستار ءومىرىنىڭ ءبىر بولشەگىنە اينالسا، مىقتى موتيۆاتسيا بولار ەدى.

كىتاپقا نۇرجان جالاۋقىزىنىڭ تاۋەلسىزدىك العان جىلداردان بەرى قارايعى ۋاقىتتا باق - تا جاريالانعان سۇقباتتارى مەن اناليتيكالىق ەڭبەكتەرى ەنگىزىلگەن. مەديا سالاسىنىڭ قىر-سىرى، مەملەكەتتىك - اقپاراتتىق ساياساتتى ءتيىمدى جۇرگىزۋدىڭ ءادىس - تاسىلدەرى، باسقا دا قۇندى دەرەكتەر جيناقتا ءساتتى توپتاستىرىلعان.

شارا سوڭىندا سۇراق قويىپ، بەلسەندى قاتىسقان ستۋدەنتتەرگە اۆتور ءوز قولتاڭباسىمەن ەڭبەگىن سىيعا تارتتى.