قما الماتى وبلىسى بويىنشا دەپارتامەنتى الماتى وبلىسى قاراساي اۋداندىق ماسليحاتىنىڭ ەكس-دەپۋتاتىنا قاتىستى اسا ءىرى كولەمدە الاياقتىق جانە قىلمىستىق كىرىستەردى زاڭداستىرۋ فاكتىسى بويىنشا تەرگەۋ جۇرگىزىلۋدە.

مەملەكەتتەن سۋبسيديا الۋ ماقساتىندا كۇدىكتى الماتى وبلىسىنىڭ اۋىل شارۋاشىلىعى باسقارماسىنا «ناگرادا» تۇرىندەگى تاڭقۋراي كوشەتتەرىن ساتىپ الۋ تۋرالى جالعان قۇجاتتاردى ۇسىنعان. سوماسى 947 ملن تەڭگەنى قۇرادى.

ناتيجەسىندە ول 474 ميلليون تەڭگە دەپ كورسەتىلگەن سومانىڭ 50% كولەمىندە زاڭسىز سۋبسيديا العان.

بۇل كىرىستەردى جىلىستاتۋ ءۇشىن كۇدىكتى 21 جەكە كاسىپكەرمەن كوشەتتەردى وراۋ، تيەۋ، ءتۇسىرۋ جۇمىستارىن ورىنداۋ ءۇشىن جالعان كەلىسىمشارتتاردى قامتيتىن كوپ دەڭگەيلى سحەمانى ازىرلەگەن، بىراق ءىس جۇزىندە بۇل جۇمىستار ورىندالماعان.

اتالعان جالعان كەلىسىمدەر مەن تولەم قۇجاتتارى نەگىزىندە 431 ملن تەڭگە سوماعا قولما-قول قاراجات الىندى.

سونىمەن قاتار، ۇرلانعان قاراجاتتاردى زاڭدى اينالىمعا تارتۋ ماقساتىندا ول جۇبايىنىڭ اتىنان باعالى قاعازدارمەن وپەراتسيالار جۇرگىزىپ، قوسىمشا 89 ملن تەڭگە قىلمىستىق تابىس تاپقان.

قىلمىستىق تابىسقا ول الماتى قالاسىنان ەكى بولمەلى پاتەر جانە «Toyota Highlander» اۆتوكولىگىن ساتىپ العان.

اتالعان مۇلىككە، سونداي-اق 50 ملن تەڭگە اقشا جانە 91 ملن تەڭگە قۇنى بار باعالى قاعازدارعا تىيىم سالىندى.

سونىمەن قاتار، مەملەكەتتەن ۇرلانعان 170 ملن تەڭگەنى كۇدىكتى قوناەۆ قالاسىنداعى كازينوعا قۇرتقانى بەلگىلى بولدى.

سوتتىڭ سانكتسياسىمەن كۇدىكتى 2 ايعا قاماۋعا الىندى.

قىلمىستىق ءىس جۇرگىزۋ كودەكسىنىڭ 201-بابىنا سايكەس باسقا اقپارات جاريالانبايدى.