QMA Almaty oblysy boiynşa departamentı Almaty oblysy Qarasai audandyq Maslihatynyŋ eks-deputatyna qatysty asa ırı kölemde alaiaqtyq jäne qylmystyq kırısterdı zaŋdastyru faktısı boiynşa tergeu jürgızılude.

Memleketten subsidiia alu maqsatynda küdıktı Almaty oblysynyŋ auyl şaruaşylyǧy basqarmasyna «Nagrada» türındegı taŋqurai köşetterın satyp alu turaly jalǧan qūjattardy ūsynǧan. Somasy 947 mln teŋgenı qūrady.

Nätijesınde ol 474 million teŋge dep körsetılgen somanyŋ 50% kölemınde zaŋsyz subsidiia alǧan.

Būl kırısterdı jylystatu üşın küdıktı 21 jeke käsıpkermen köşetterdı orau, tieu, tüsıru jūmystaryn oryndau üşın jalǧan kelısımşarttardy qamtityn köp deŋgeilı shemany äzırlegen, bıraq ıs jüzınde būl jūmystar oryndalmaǧan.

Atalǧan jalǧan kelısımder men tölem qūjattary negızınde 431 mln teŋge somaǧa qolma-qol qarajat alyndy.

Sonymen qatar, ūrlanǧan qarajattardy zaŋdy ainalymǧa tartu maqsatynda ol jūbaiynyŋ atynan baǧaly qaǧazdarmen operasiialar jürgızıp, qosymşa 89 mln teŋge qylmystyq tabys tapqan.

Qylmystyq tabysqa ol Almaty qalasynan ekı bölmelı päter jäne «Toyota Highlander» avtokölıgın satyp alǧan.

Atalǧan mülıkke, sondai-aq 50 mln teŋge aqşa jäne 91 mln teŋge qūny bar baǧaly qaǧazdarǧa tyiym salyndy.

Sonymen qatar, memleketten ūrlanǧan 170 mln teŋgenı küdıktı Qonaev qalasyndaǧy kazinoǧa qūrtqany belgılı boldy.

Sottyŋ sanksiiasymen küdıktı 2 aiǧa qamauǧa alyndy.

Qylmystyq ıs jürgızu kodeksınıŋ 201-babyna säikes basqa aqparat jariialanbaidy.