استانادا مەكتەپ وقۋشىلارىنىڭ بويىنا ۇلتتىق قۇندىلىقتارعا دەگەن قۇرمەتتى قالىپتاستىرۋ ماقساتىندا «كۇي كۇمبىرى» اتتى اكتسيا ءوتتى، دەپ حابارلايدى ەلوردا اكىمدىگىنىڭ رەسمي سايتى.
اتالمىش ءىس-شارا اياسىندا ەلىمىزدىڭ بارلىق وڭىرىندەگى ءبىلىم بەرۋ ۇيىمدارىندا دومبىرا ءۇنى ءبىر مەزەتتە شىرقالدى. باس قالاداعى №103 مەكتەپتە وتكەن ءىس-شاراعا وقۋشىلار مەن ۇستازدار بەلسەندى قاتىستى. ولار دومبىرانىڭ كۇمبىرلەگەن ءۇنى ارقىلى مەكتەپ اۋلاسىن ەرەكشە رۋحقا بولەپ، قاتىسۋشىلارعا كوتەرىڭكى كوڭىل كۇي سىيلادى.
«وقۋشىلار ۇلتتىق كيىممەن ونەر كورسەتىپ، ءىس-شارانىڭ مازمۇنىن ودان ءارى بايىتتى دەۋگە بولادى. ولارعا ۇلتتىق ونەردىڭ، ونىڭ ىشىندە كۇي ونەرىنىڭ تاريحى مەن تاربيەلىك ءمانى تۋرالى كەڭىنەن تۇسىندىرىدىك»، – دەيدى مۋزىكا ءپانىنىڭ مۇعالىمى زاكيرا قۇرمانبەكقىزى.
ونىڭ پىكىرىنشە، مادەني اكتسيا وقۋشىلاردىڭ شىعارماشىلىق قابىلەتىن دامىتۋعا، ۇلتتىق مادەنيەتكە دەگەن سۇيىسپەنشىلىگىن ارتتىرۋعا باعىتتالعان.
«بۇگىن ءبارىمىز بىرگە كۇي ورىنداعان كەزدە ەرەكشە سەزىمدە بولدىم. دومبىرا تارتۋ – مەن ءۇشىن ۇلكەن ماقتانىش»، – دەيدى 3-سىنىپ وقۋشىسى نۇرمۇحامبەت بورانباي.
استانا قالاسى ءبىلىم باسقارماسى جانە «بالالارعا قوسىمشا ءبىلىم بەرۋ وقۋ-ادىستەمەلىك ورتالىعىنىڭ» بۇل باستاماسى ۇلتتىق رۋحتى جاڭعىرتىپ قانا قويماي، كۇي ارقىلى وقۋشىلاردىڭ ادامگەرشىلىك تاربيەسىن نىعايتۋعا ىقپال ەتۋدى كوزدەيدى.
