ساپار بارىسىندا ەڭ الدىمەن كەڭەسشى وتكەن جىلى سۋ تاسقىنىنان زارداپ شەككەن قاراتوبە اۋدانىنىڭ اققوزى اۋىلدىق وكرۋگى قورجىن اۋىلىن جانە ماڭىنداعى جاقسىباي وزەنىنىڭ ارناسىن تىكۇشاقپەن شولىپ ءوتتى. 

بۇدان كەيىن وبلىستىق ماڭىزى بار جىمپيتى – قاراتوبە تاسجولىنىڭ 102-شاقىرىمىنداعى قالدىعايتى وزەنىنىڭ شايعان بولىگىن كورىپ، سول ماڭداعى قالدىعايتى وزەنى ارناسىنا سالىنعان باعىتتاۋشى بوگەتتىڭ جۇمىسىمەن تانىستى. 

ەرالى توعجانوۆ سۋ باسۋ قاۋپى جوعارى سانالاتىن سىرىم، شىڭعىرلاۋ جانە ءبورلى، تەرەكتى اۋداندارىنداعى وزەندەر مەن ەلدى مەكەندەردى اۋەدەن شولىپ، جاعدايدى باعامدادى. سۋ تاسقىنىنىڭ الدىن الۋ شارالارى بويىنشا ءتيىستى مەكەمەلەرگە ناقتى تاپسىرمالار بەرىلدى.

وبلىس باسشىلىعى مەن جاۋاپتى قىزمەتتەر بۇل باعىتتاعى جۇمىستاردى كۇشەيتىپ، كوكتەمگى سۋ تاسقىنىنا قارسى قاجەتتى شارالاردى الدىن الا قابىلداۋدا.

پرەمەر-مينيستر ولجاس بەكتەنوۆتىڭ تاپسىرماسىمەن سۋ تاسقىنىنىڭ الدىن الۋعا باعىتتالعان كەشەندى جۇمىستار باسقا دا وڭىرلەردە ءتيىستى دارەجەدە اتقارىلىپ جاتىر.  ۇكىمەت باسشىسىنىڭ ورىنباسارى قانات بوزىمباەۆ اقتوبە وبلىسىندا، باسقا دا ۇكىمەت مۇشەلەرى وزگە دە وڭىرلەردە قىزمەتتىك ءىس-ساپارمەن جۇرگەنى تۋرالى اقپارات بەرىلگەن بولاتىن.