Сапар барысында ең алдымен кеңесші өткен жылы су тасқынынан зардап шеккен Қаратөбе ауданының Аққозы ауылдық округі Қоржын ауылын және маңындағы Жақсыбай өзенінің арнасын тікұшақпен шолып өтті.
Бұдан кейін облыстық маңызы бар Жымпиты – Қаратөбе тасжолының 102-шақырымындағы Қалдығайты өзенінің шайған бөлігін көріп, сол маңдағы Қалдығайты өзені арнасына салынған бағыттаушы бөгеттің жұмысымен танысты.
Ералы Тоғжанов су басу қаупі жоғары саналатын Сырым, Шыңғырлау және Бөрлі, Теректі аудандарындағы өзендер мен елді мекендерді әуеден шолып, жағдайды бағамдады. Су тасқынының алдын алу шаралары бойынша тиісті мекемелерге нақты тапсырмалар берілді.
Облыс басшылығы мен жауапты қызметтер бұл бағыттағы жұмыстарды күшейтіп, көктемгі су тасқынына қарсы қажетті шараларды алдын ала қабылдауда.
Премьер-министр Олжас Бектеновтың тапсырмасымен су тасқынының алдын алуға бағытталған кешенді жұмыстар басқа да өңірлерде тиісті дәрежеде атқарылып жатыр. Үкімет басшысының орынбасары Қанат Бозымбаев Ақтөбе облысында, басқа да үкімет мүшелері өзге де өңірлерде қызметтік іс-сапармен жүргені туралы ақпарат берілген болатын.
