وندا ونەركاسىپ جانە قۇرىلىس ءمينيسترى ەرسايىن ناعاسپاەۆ الەۋمەتتىك سالا نىساندارىن، تۇرعىن ءۇي قورىن جانە ينجەنەرلىك ينفراقۇرىلىمدى دايىنداۋ بويىنشا بايانداما جاسادى.

مينيستر بۇگىندە بارلىق وڭىردە الداعى جىلىتۋ ماۋسىمىنا دايىندىق جۇمىستارى جۇرگىزىلىپ جاتقانىن مالىمدەدى. قازىرگى ۋاقىتتا ءبىلىم بەرۋ نىساندارىنىڭ دايىندىعى 92%-دى قۇراپ وتىر. جوسپاردان قالىپ وتىرعان 3 ءوڭىر بار: ولار – الماتى، قوستاناي جانە قاراعاندى وبلىستارى. دەنساۋلىق ساقتاۋ نىساندارى بويىنشا دا وسىنداي جاعداي قالىپتاسىپ وتىر. دايىندىق 91%-دى قۇرايدى، ياعني بۇگىنگى تاڭدا 5,7 مىڭنان استام نىساننىڭ شامامەن 5,2 مىڭى ماۋسىمعا دايىن. الايدا، تومەن كورسەتكىشتەر قاراعاندى، الماتى جانە قوستاناي وبلىستارىندا بايقالۋدا.

تۇرعىن ۇيلەر بويىنشا جىلىتۋ ماۋسىمىنا دايىندىق جۇمىستارى 43,2 مىڭ ۇيدە اياقتالدى، بۇل جوسپاردىڭ 83%-ىن قۇرايدى. شىمكەنت قالاسىندا، جامبىل جانە قوستاناي وبلىستارىندا تۇرعىن ۇيلەردىڭ دايىندىق دەڭگەيى تومەن.

«وڭىرلەردە ينجەنەرلىك ينفراقۇرىلىم بويىنشا دا جوندەۋ جۇمىستارى جۇرگىزىلۋدە. سۋمەن جابدىقتاۋ جەلىلەرىنىڭ 973 شاقىرىمىنىڭ 610 شاقىرىمى جوندەلگەن. سۋ بۇرۋ جەلىلەرى 172 شاقىرىمىنىڭ شامامەن 100 شاقىرىمى جوندەلدى. تومەن كورسەتكىشتەر الماتى قالاسىندا، ۇلىتاۋ، قوستاناي، ماڭعىستاۋ وبلىستارىندا ورىن الىپ وتىر»، — دەدى ەرسايىن ناعاسپاەۆ.

سونىمەن قاتار جىلىتۋ ماۋسىمىنىڭ تۇراقتى ءوتۋى ماقساتىندا اۆتونومدى قازاندىقتاردىڭ دايىندىعىنا مونيتورينگ جۇرگىزىلۋدە. اكىمدىكتەردىڭ مالىمەتى بويىنشا، بۇگىندە 11,2 مىڭ اۆتونومدى قازاندىق جىلىتۋ ماۋسىمىنا دايىن، بۇل ەلىمىز بويىنشا 85%-دى قۇرايدى.

مينيستر اۆتونومدى قازاندىقتار ءۇشىن كومىر قورى 51%-عا دايىندالعانىن، مازۋت قورى 91%-عا، ديزەل وتىنى 39%-عا دايىن ەكەنىن جەتكىزدى.

 الداعى جىلىتۋ ماۋسىمىنا ۋاقتىلى دايىندىقتى قامتاماسىز ەتۋ ماقساتىندا اكىمدىكتەر:

- 1 قىركۇيەككە دەيىن ءبىلىم بەرۋ نىساندارىنىڭ تولىق دايىندىعىن جانە 15 قازانعا دەيىن دەنساۋلىق ساقتاۋ، تۇرعىن ءۇي-كوممۋنالدىق شارۋاشىلىق جانە تۇرعىن ءۇي قورى نىساندارىنىڭ دايىندىعىن قامتاماسىز ەتۋ;

- سونىمەن قاتار قىركۇيەكتىڭ سوڭىنا دەيىن سۋمەن جابدىقتاۋ جانە كارىز جۇيەلەرىندە جوندەۋ جۇمىستارىن اياقتاۋ;

- جانە ورتالىق، سولتۇستىك، شىعىس وڭىرلەر مەن ەلوردادا 15 قىركۇيەككە دەيىن، ال قالعان وڭىرلەردە 15 قازانعا دەيىن جىلىتۋ ماۋسىمىنا تولىق دايىندىقتى قامتاماسىز ەتۋ قاجەت.

«اتالعان باعىتتاعى جۇمىستار مينيسترلىكتىڭ قاتاڭ باقىلاۋىندا بولادى»، — دەپ تۇيىندەدى ءسوزىن مينيستر.

ۇكىمەتتىڭ سايتىنان