بۇگىن وبلىس اكىمى نۇرلىبەك نالىباەۆتىڭ قاتىسۋىمەن ر.ءالىارىستانۇلى اتىنداعى جەكە مەكتەپتى مەملەكەتتىك مەنشىككە الۋ بويىنشا مەموراندۋمعا قول قويۋ ءراسىمى ءوتتى. وعان جاۋاپتى سالا باسشىلارى، سەلەكتورلىق رەجيمدە قالا، اۋدان اكىمدەرى، زيالى قاۋىم وكىلدەرى قاتىستى.

ايماق باسشىسى اتقارىلعان اۋقىمدى جۇمىستارعا، سوڭعى جىلدارى بيۋدجەت قارجىسىنىڭ باسىم بولىگى الەۋمەتتىك سالاعا، ونىڭ ىشىندە ءبىلىم سالاسىنا باعىتتالعانىنا توقتالدى.

«وڭىرىمىزدە پرەزيدەنتىمىزدىڭ، ۇكىمەتتىڭ ەرەكشە قولداۋىمەن تىڭ باستامالار جۇزەگە اسىرىلۋدا. جاس ۇرپاقتىڭ ساپالى ءبىلىم الۋى – جۇمىسىمىزدىڭ باستى باسىمدىعى. ءبىلىم بەرۋ سالاسىنا سوڭعى 3 جىلدا 812 ملرد. 245 ملن. تەڭگە، بيىل 302 ملرد. تەڭگە قارالدى.

بولىنگەن قارجىنىڭ تۇپكىلىكتى ماقساتقا جەتۋىن قاداعالاۋدىڭ ناقتى شارالارى قابىلدانعان. 2023 جىلدان بەرى «فەيس-باقىلاۋ» موبيلدىك قوسىمشاسى قولدانىسقا ەنگىزىلىپ، بالاباقشالارعا جالعان تىركەلگەن 19 263 بالا انىقتالدى، 28 ملرد. 100 ملن. تەڭگە ۇنەمدەلدى. ەمحانانىڭ جالعان انىقتاماسىن تىركەۋ، نەگىزسىز دەمالىس كۇندەرىن انىقتاۋ ەسەبىنەن 6 ملرد. 700 ملن. تەڭگە بيۋدجەتكە قايتارىلدى.

وبلىستا دەموگرافيالىق ءوسىم مەن حالىقتىڭ كوشىپ-قونۋ بەلسەندىلىگى جوعارى بولعاندىقتان، وقۋشى سانىنىڭ جىل سايىن ارتقانى بايقالادى. جاڭا وقۋ جىلىندا 1-11 سىنىپتا 189 288 وقۋشى تىركەلدى، وتكەن وقۋ جىلىمەن سالىستىرعاندا 4 364 بالاعا كوبەيگەن.

وسى رەتتە ورىن قاجەتتىلىگى جەكە ينۆەستيتسيا ەسەبىنەن دە شەشىمىن تابۋدا. جەكە سەكتورعا مەملەكەت تاراپىنان قولداۋ جاسالعان. ءبىز ءوز كەزەگىمىزدە تازا، شىنايى جۇمىس ىستەيتىن كاسىپكەرلەردى ۇنەمى قولداپ كەلەمىز.

وتكەندە مەملەكەت جانە قوعام قايراتكەرى مۇرات باقتيارۇلى بيزنەستىڭ الەۋمەتتىك جاۋاپكەرشىلىگى اياسىندا 2023 جىلدىڭ قىركۇيەگىندە اشىلعان «Oردا سكۋل-2» جەكە مەكتەبىن مەملەكەت مەنشىگىنە سىيعا بەردى. بۇگىن دە ءدال سونداي يگى ءىستىڭ كۋاسى بولامىز.

ءبىزدىڭ ەڭ ءبىرىنشى مىندەتىمىز – بالالارىمىزدىڭ جان-جاقتى، ساپالى ءبىلىم الۋىنا قولايلى جاعداي جاساپ، جايلى ورتا قالىپتاستىرۋ. وسكەلەڭ ۇرپاق تاربيەسىمەن اينالىساتىن بارشا باستامالارىڭىزعا ساتتىلىك تىلەيمىن جانە ورتاق جۇمىستى بىرلەسىپ اتقارۋعا شاقىرامىن!» – دەدى ن.نالىباەۆ.

راسىمدە وبلىستىق ءبىلىم باسقارماسىنىڭ باسشىسى اسقاربەك ەسجانوۆ پەن ر.ءالىارىستانۇلى اتىنداعى جەكە مەكتەپتىڭ قۇرىلتايشىسى شاركۇل يمانبەرديەۆا مەكتەپ عيماراتىن وبلىستىق كوممۋنالدىق مەنشىككە بەرۋ تۋرالى مەموراندۋمعا قول قويدى.

سونىمەن بىرگە شاركۇل يمانبەرديەۆا، مەملەكەت جانە قوعام قايراتكەرى باقبەرگەن دوسمانبەتوۆ، «ۇلاعات» مەكتەبىنىڭ قۇرىلتايشىسى، قازاقستاننىڭ ەڭبەك سىڭىرگەن قايراتكەرى قالقازبەك اجىبەكوۆ ءسوز سويلەپ، جاس ۇرپاققا ساپالى ءبىلىم بەرۋدىڭ ماڭىزدىلىعىنا توقتالدى.

ايتا كەتۋ كەرەك، وتكەن جىلى وڭىردە 13 ءبىلىم بەرۋ ۇيىمى جاڭادان اشىلدى. «كەلەشەك مەكتەپتەرى» ۇلتتىق جوباسى اياسىندا 10 مەكتەپ سالىنىپ، پايدالانۋعا بەرىلدى.

قىزىلوردا وبلىسى اكىمىنىڭ ءباسپاسوز قىزمەتى