ءوڭىر باسشىسى ەربول قاراشوكەەۆ تاراز قالاسى «ۇلى دالا» (15) شاعىناۋدانىنداعى №69 جاڭا مەكتەپتىڭ اشىلۋ سالتاناتىنا قاتىستى.
ەربول قاراشوكەەۆ وقۋشىلار، پەداگوگتەر مەن اتا-انالار الدىندا قۇتتىقتاۋ ءسوز سويلەدى.
- «جايلى مەكتەپ» ۇلتتىق جوباسى مەملەكەت باسشىسى قاسىم-جومارت كەمەلۇلى توقاەۆتىڭ تىكەلەي تاپسىرماسى بويىنشا ەلىمىزدىڭ بارلىق وڭىرلەرىندە جۇزەگە اسىرىلۋدا. وتكەن جىلى وبلىستا 3 جايلى مەكتەپ سالىندى. بيىل تاراز قالاسى ءشولدالا القابىندا 1 جانە قورداي اۋدانىندا 2 جايلى مەكتەپ اشىلادى دەپ كۇتىلۋدە. ءبىلىم بەرۋ ينفراقۇرىلىمىنىڭ ساپاسىن ارتتىرۋ نەگىزگى باعىتتاردىڭ ءبىرى بولىپ قالا بەرەدى، - دەدى وبلىس اكىمى.
جاڭا ۇلگىدەگى مەكتەپتە 97 كابينەت، 3 شەبەرحانا، 6 زەرتحانا، 4 كومپيۋتەرلىك سىنىپ، حورەوگرافيالىق زالدار، كوۆوركينگ-ورتالىقتار، ۇلكەن اسحانا جانە 4 سپورتزالى قاراستىرىلعان. سىنىپتاردا ينتەراكتيۆتى تاقتالار ورناتىلعان. ءبىلىم ۇياسىندا 1310 وقۋشى وقيدى.
2000 بالاعا ارنالعان مەكتەپ وقۋشىلاردىڭ IT-قۇزىرەتتەرىن، عىلىمي جانە شىعارماشىلىق الەۋەتىن قولداۋ ءۇشىن زاماناۋي روبوتوتەحنيكا كابينەتتەرىمەن جانە STEM-زەرتحانالارمەن جابدىقتالعان، سونىمەن بىرگە بەينەباقىلاۋ جۇيەلەرىمەن قامتاماسىز ەتىلگەن.
وقۋ ورداسىندا ينكليۋزيۆتى ءبىلىم بەرۋگە ءجىتى كوڭىل ءبولىنىپ وتىر. ەرەكشە قاجەتتىلىكتەرى بار بالالار ءۇشىن پاندۋستار، ليفتتەر، سانيتارلىق توراپتار جانە ينكليۋزيۆتى ءبىلىم بەرۋ كابينەتى قاراستىرىلعان.
- مەنىڭ 3 بالام جايلى مەكتەپتىڭ تابالدىرىعىن اتتاپ وتىر. ولاردىڭ زاماناۋي جابدىقتالعان، كەڭ ءارى جايلى ورتادا وقيتىنىنا وتە قۋانىشتىمىن. جاڭا ءبىلىم ۇياسىندا ۇل-قىزدارىم جان-جاقتى دامىپ، جەمىستى جەتىستىكتەرگە قول جەتكىزەدى دەپ سەنەمىن،- دەيدى 7 بالانىڭ اناسى مايرا اسىلوۆا.
بيىل وبلىستا 26 ءبىلىم بەرۋ نىسانىنىڭ قۇرىلىسى جوسپارلانعان، ونىڭ 21-ءى (11 مەكتەپ جانە 10 قوسىمشا عيمارات) جىل سوڭىنا دەيىن پايدالانۋعا بەرىلەدى دەپ كۇتىلۋدە.
2026 جىلى تاعى 6 ءبىلىم بەرۋ نىسانىنىڭ (4 مەكتەپ جانە 2 قوسىمشا عيمارات) قۇرىلىسى باستاۋ الادى.
اكىمدىكتىڭ ءباسپاسوز قىزمەتى
