قازاقستان رەسپۋبليكاسىنىڭ قارجى مينيسترلىگى كاسىبي بۋحگالتەرلىك ۇيىمدارمەن بىرلەسە وتىرىپ، 2026 جىلدىڭ 5 قاڭتارى مەن 30 ماۋسىمى ارالىعىندا وتكەن رەسپۋبليكالىق «حالىق بۋحگالتەرى» اكتسياسىن قورىتىندىلادى.

اكتسيانىڭ نەگىزگى ماقساتى – كاسىپكەرلەرگە پراكتيكالىق قولداۋ كورسەتۋ، سالىقتىق جانە بۋحگالتەرلىك ەسەپتى جۇرگىزۋدىڭ ساپاسىن جاقسارتۋ جانە سالىق تولەۋشىلەرگە 2026 جىلى كۇشىنە ەنگەن سالىق زاڭناماسىنداعى وزگەرىستەردى تۇسىنۋگە كومەكتەسۋ. اكتسيا اياسىندا وبلىس ورتالىقتارىنداعى، سونداي-اق استانا، الماتى، شىمكەنت قالالارىنداعى مەملەكەتتىك كىرىستەر دەپارتامەنتىنىڭ بولىمشەلەرىندە ازاماتتارعا تەگىن جەكە كەڭەس بەرۋ ۇيىمداستىرىلدى. كەڭەس بەرۋ كاسىبي بۋحگالتەرلەر مەن مەملەكەتتىك كىرىستەر ورگاندارىنىڭ قىزمەتكەرلەرىمەن جۇرگىزىلدى. اكتسياعا جالپى 120-دان استام اككرەديتاتسيادان وتكەن كاسىبي بۋحگالتەرلەر قاتىستى. التى ايدىڭ ىشىندە بۇل اكتسيا سۇرانىسقا يە، كاسىبي بۋحگالتەرلەر قاۋىمداستىعى جانە بيزنەس سەكتورى اراسىنداعى مەملەكەتتىڭ اشىق ديالوگ الاڭىنا اينالدى.

         اكتسيا ناتيجەسى بويىنشا:

60 مىڭنان استام سالىق تولەۋشىلەر تەگىن كەڭەس الدى;

3247 اشىق ەسىك كۇنى ءىس-شاراسى وتكىزىلدى;

جەرگىلىكتى دەڭگەيدە 2928 سەمينار ۇيىمداستىرىلدى;

512 سۇحبات پەن ساراپتامالىق تۇسىنىكتەمەلەر دايىندالدى;

باق، تەلەديدار، راديو جانە الەۋمەتتىك جەلىلەردە 10 مىڭنان استام ماقالا جاريالاندى;

اقپاراتتىق روليكتەر راديوستانتسيالاردا 45 000-نان استام رەت شىعارىلدى;

Zakon.kz اقپاراتتىق قولداۋىمەن اكتسيا ماتەريالدارى، سونىڭ ىشىندە ءتورت ۆەبينار – 2,5 ملن قارالىم جينادى.

تاجىريبە كورسەتكەندەي، كاسىپكەرلەر اراسىندا تىكەلەي ءوزارا ارەكەتتەسۋ فورماتىنا سۇرانىس ايتارلىقتاي جوعارى. قاتىسۋشىلار جاڭا سالىق كودەكسىن قولدانۋ، وڭتايلى سالىق رەجيمىن تاڭداۋ، وتپەلى كەزەڭنىڭ ەرەكشەلىكتەرى، سالىق جەڭىلدىكتەرى مەن شەگەرىمدەرى، ققس بويىنشا تىركەۋ جانە ەسەپتەن شىعارۋ، ارناۋلى سالىق رەجيمدەرىن قولدانۋ، ەلەكتروندى شوت-فاكتۋرالاردى راسىمدەۋ، اقپاراتتىق جۇيەلەردى پايدالانۋ، ءوزىن-ءوزى جۇمىسپەن قامتىعان جەكە تۇلعالاردى ەسەپكە الۋ جانە ولاردىڭ قىزمەتىنە قاتىستى ماسەلەلەر بويىنشا ساراپتامالىق تۇسىنىكتەمەلەر الدى. اكتسيانىڭ ەرەكشە قۇندى اسپەكتىسى كاسىپكەرلەردىڭ تاجىريبەلى كاسىبي بۋحگالتەرلەردەن جانە مەملەكەتتىك كىرىستەر ورگاندارىنىڭ قىزمەتكەرلەرىنەن تىكەلەي جەكە كەڭەس الۋى بولدى، بۇل ولارعا ناقتى جاعدايلاردىڭ شەشىمىن تەز تابۋعا جانە سالىق مىندەتتەمەلەرىن ورىنداۋ كەزىندە ىقتيمال قاتەلەردىڭ الدىن الۋعا مۇمكىندىك بەردى. «حالىق بۋحگالتەرى» سالىق ساۋاتتىلىعىن ارتتىرۋعا، سالىقتىق مىندەتتەمەلەردى ەرىكتى ورىنداۋ مادەنيەتىنە تاربيەلەۋگە جانە قولايلى بيزنەس-ورتانى قۇرۋعا باعىتتالعان مەملەكەت پەن كاسىبي قوعامداستىق اراسىنداعى ىنتىماقتاستىقتىڭ ءتيىمدى ۇلگىسىنە اينالدى. تەگىن كاسىبي كومەك مىڭداعان كاسىپكەرلەرگە زاڭنامالىق وزگەرىستەرگە سەنىمدىرەك بەيىمدەلۋگە جانە ەڭ وزەكتى سۇراقتارىنا دەر كەزىندە جاۋاپ الۋعا مۇمكىندىك بەردى.

وسى تاجىريبە ءارى دە ءوز جالعاسىن تاۋىپ، جەرگىلىكتى مەملەكەتتىك كىرىستەر بازاسىندا اي سايىن، بۋحگالتەرلىك ۇيىمدارمەن بىرلەسە وتىرىپ سالىق زاڭناماسىن ءتۇسىندىرۋ بويىنشا «اشىق ەسىك كۇندەرى» وتكىزىلەتىن بولادى.