ەرالى لۇقپانۇلى: " ... مەملەكەت باسشىسى ايتقانىنداي، بۇگىندە جاھاندىق ەكونوميكا، حالىقارالىق قاتىناس پەن وڭىرلىك ىنتىماقتاستىقتى نىعايتۋ سۇراقتارى كۇن تارتىبىنە شىعىپ وتىر. سول سەبەپتى، بۇل ماسەلەلەردىڭ استانا حالىقارالىق فورۋمىنىڭ باستى باعىتتارىنا اينالۋى زاڭدىلىق. ادامزات بالاسىنىڭ ۇلى يگىلىگىنە اينالعان، قازاق دالاسى ءۇشىن ماڭىزدى، تاۋەلسىزدىگىمىزدىڭ تىرەگى سانالاتىن – تاتۋلىق پەن بىرلىك سۇراقتارى بۇگىندە ەرەكشە قۇندىلىقتار قاتارىنا شىقتى. ەڭ اسىل قاسيەتكە اينالعان - بىرلىك پەن تاتۋلىق ۇعىمدارىنىڭ تۇبىندە سەنىم جاتىر. ال، سەنىم – تۇراقتىلىق بولعان كەزدە عانا سالتانات قۇراتىنى ءسوزسىز. سوندىقتان دا، تاتۋلىعى مىعىم، سەنىمى بەرىك مەملەكەتكە عانا ينۆەستورلار كەلەدى. ال، ينۆەستيتسيا ەكونوميكانىڭ اجىراماس بولىگى ەكەنى بەلگىلى.
قاسىم-جومارت كەمەلۇلى اتاپ وتكەندەي، بۇگىنگىدەي دۇنيە ءجۇزىن قاقتىعىستار مەن سوعىس ءورتى جايلاعان ۋاقىتتا، ادامزات بالاسى رۋحاني قۇلدىراپ عانا قويماي، ەكونوميكالىق شىعىنعا دا ۇشىراپ وتىر. وسىلايشا، ادامزات بالاسىن تىعىرىققا تىرەگەن «بەلگىسىزدىكتىڭ» شىرماۋىنان قالاي شىعامىز دەگەن وي فورۋمعا قاتىسۋشىلاردىڭ نەگىزگى سۇراعىنا اينالدى. حالىقارالىق ساراپشىلار بيىك مىنبەردەن الدا قانداي تاڭداۋ تۇر، قالتارىستاردان «ىسىلىپ» شىعامىز با، الدە، «قىسىلىپ» شىعامىز با؟ ، دەگەن سۇراقتاردى ءوزارا تالقىعا سالىپ جاتتى. بۇل جيىن الەمنىڭ تۇكپىر-تۇكپىرىنەن كەلگەن ساراپشى-مامانداردى ءبىر الاڭدا توعىستىرىپ، ەركىن پىكىر الماسۋعا مۇمكىندىك جاسايتىن بىرەگەي پلاتفورماعا اينالىپ وتىر. جاھاندىق جاڭا تەرمينگە اينالعان جاساندى ينتەللەكتەن باستاپ، كرەاتيۆتى يندۋستريامىز، ەكونوميكانىڭ جاڭا سەكتورلارىن دامىتۋ ت.س. ادامزات بالاسى ءۇشىن وزەكتى سۇراقتاردىڭ باسقا ەمەس، ءوز ەلىمىزدە – استانامىزدا تالقىلانىپ جاتقانى ەرەكشە ماڭىزعا يە. تاريحقا شەگىنىس جاساساق، ەلدىڭ جاقسىلارى، شەشەندەرى، ويشىلدارى جينالىپ، اڭگىمە-دۇكەن قۇرىپ كەلەلى سۇراقتاردى كۇن تارتىبىنە شىعارىپ، شەشۋ جولدارىن ەل بولىپ، ۇلت بولىپ تالقىلاپ، ويلاستىرىپ وتىرعان. مۇنداي ىرگەلى كەزدەسۋلەر مەن كەلەلى جيىندار اتا- بابامىز سالعان سارا جولدى جاڭعىرتىپ عانا قويماي، ۇرپاقتار ساباقتاستىعىنا جاڭا سەرپىن بەرەرى ءسوزسىز، - دەلىنگەن جازبادا.
