شاراعا قازاقستان رەسپۋبليكاسى پرەمەر-ءمينيسترىنىڭ ورىنباسارى تامارا دۇيسەنوۆا، پرەمەر-ءمينيستردىڭ كەڭەسشىسى ەرالى توعجانوۆ، «AMANAT» پارتياسىنىڭ حاتشىسى ەرجان جىلقىباەۆ، اۋىل شارۋاشىلىعى ۆيتسە-ءمينيسترى ەربول تاسجۇرەكوۆ، ۇلتتىق ەكونوميكا ۆيتسە-ءمينيسترى باۋىرجان وماربەكوۆ، ەلىمىزدىڭ بارلىق وڭىرلەرىنەن وبلىس اكىمىنىڭ ورىنباسارلارى، اۋىل شارۋاشىلىعى باسقارمالارى مەن الەۋمەتتىك كورپوراتسيالار باسشىلارى، اۋىل اكىمدەرى، بيزنەس وكىلدەرى ارنايى قاتىستى.
باستى ماقسات – ۇكىمەت باسشىسىنىڭ تاپسىرماسىنا سايكەس «اۋىل اماناتى» باعدارلاماسىن قىزىلوردا وبلىسىندا ىسكە اسىرۋ تاجىريبەسىن رەسپۋبليكانىڭ وزگە وڭىرلەرىنە كەڭىنەن تاراتۋ.
Ras.kz اقپاراتتىق پورتالى پرەمەر-ءمينيستردىڭ كەڭەسشىسى ەرالى توعجانوۆتىڭ «اۋىل اماناتى» باعدارلاماسىنىڭ ورىندالۋ بارىسى، ماڭىزى تۋرالى سۇراپ بىلگەن ەدى.
پرەمەر-ءمينيستردىڭ كەڭەسشىسى ەرالى توعجانوۆ:
« ... شارانىڭ نەگىزگى ماقساتتارىنىڭ ءبىرى - «اۋىل اماناتى» باعدارلاماسىنىڭ وڭىرلەردەگى ورىندالۋ دەڭگەيىن قايتا قاراپ، ناقتىلايتىن تۇستارىن پىسىقتاپ، ءتيىمدى قورىتىندىلار شىعارۋ. وزدەرىڭىزگە بەلگىلى، مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن جۇزەگە اسىرىلىپ جاتقان ايتۋلى جوبانىڭ ماقساتى – حالىقتىڭ الەۋمەتتىك جاعدايىن جاقسارتۋ، اۋىل تۇرعىندارىنىڭ تۇرمىس دەڭگەيلەرىن جاڭا دەڭگەيگە كوتەرۋ. ارينە، وسى تۇستا اۋىلدا تۇراتىن بارلىق ازاماتتاردىڭ الەۋمەتتىك جاعدايىن كوتەرۋمەن قاتار، ولاردى جۇمىسپەن قامتاماسىز ەتۋ سۇراعىنىڭ دا كۇن تارتىبىنە شىعاتىنى بەلگىلى. ال، باعدارلامانى ءتيىمدى جۇرگىزۋ ءۇشىن - ءاربىر اۋىلدا جاڭا جۇمىس ورىندارىن قۇرۋ ماسەلەسىن شەشىپ الۋ كەرەك. ول ءۇشىن، سايكەسىنشە، ءوندىرىستى جانداندىرۋ كەرەك. بۇگىندە وسى ماقساتتا ناقتى اناليزدەر جاسالدى. سوعان سايكەس، ورتاق تۇجىرىمدار شىعارىلدى. وسى تۇستا ايتا كەتۋ كەرەك، ءاربىر اۋىلدا تىرەك بولاتىن الەۋمەتتىك ەكونوميكالىق جوسپار ناقتىلانىپ جاتىر. ءتيىستى سالا باسشىلارى – اۋىل شارۋاشىلىعى، ەكونوميكا سالالارىنىڭ جاۋاپتى ازاماتتارىمەن جوعارىدا ايتىلعان سۇراقتار تالقىلانۋدا. مۇمكىندىگى شەكتەۋلى ازاماتتاردىڭ تاۋارلىق نەسيە ارقىلى باعدارلاماعا قاتىسۋىن قامتاماسىز ەتۋدە كۇن تارتىبىندە تۇر. ولاي دەيتىنىمىز، كوپتەگەن اۋىل ازاماتتارىنىڭ كرەديت تاريحى جوباعا قاتىسۋعا مۇمكىندىك بەرمەيدى. وسى سىندى سۇراقتار كوتەرىلدى.
جالپى كەلەسى جىلعا «اۋىل اماناتى» بويىنشا 50 ملرد.تەڭگە قاراجات ءبولىندى. ۇكىمەت تاراپىنان بەرىلگەن قاراجاتتى ءتيىمدى يگەرە الماعان وڭىرلەرگە قاتىستى دا بۇعان دەيىن بىرنەشە رەت ماسەلە كوتەرگەنبىز. كەي وڭىردە بەرىلگەن قاراجاتتىڭ 80 پايىزعا جۋىعى تەك مال شارۋاشىلىعىنا بولىنگەن. بۇكىل قاراجاتتى تەك ەت باعىتىنا جىبەرۋ قيسىنسىز. ەندى وسىنداي ولقىلىقتارعا جول بەرىلمەيدى. اۋىلدا شىعاتىن 65 تاعام ونىمدەرىنىڭ قانشا پايىزى، قانداي تۇرلەرى سىرتتان كەلەتىنى ءجىتى انىقتالادى. تاعى ءبىر ماسەلە، قاي وبلىستا ناقتى جوبالار مەن دايىن ۇسىنىستار بولسا، الدىمەن، سول وڭىرلەرگە بەرىلەتىن بولادى. بۇگىندە «اۋىل اماناتى» بويىنشا بەلسەندى ءۇش وبلىستى ەرەكشە اتاپ وتۋگە بولادى. ولار قىزىلوردا وبلىسى، تۇركىستان جانە باتىس قازاقستان وبلىستارى. بۇل وڭىرلەرگە كەلەسى جىلعا 5,5 ملرد. تەڭگەدەن 7 ،5 ملرد. تەڭگەگە دەيىن قاراجات ءبولىنىپ وتىر. ال، يگەرۋ دەڭگەيى تومەن وبلىستارعا سايكەسىنشە، اقشانى ءبولۋ دەڭگەيى دە تومەن بولادى. بولاشاقتا دا بۇل پرينتسيپ ساقتالادى. "
