كەزدەسۋ بارىسىندا اباتتاندىرۋ، گازداندىرۋ، جول ينفراقۇرىلىمى جانە الەۋمەتتىك سالانى دامىتۋ ماسەلەلەرى تالقىلاندى.

اۋداننىڭ كەشەندى دامۋى اياسىندا ەكى قوعامدىق كەڭىستىكتى اباتتاندىرۋ جوسپارلانعان. ونىڭ ءبىرى – دەنە شىنىقتىرۋ-ساۋىقتىرۋ كەشەنى جانىندا، ەكىنشىسى – سىرىم باتىر جانە بويتۇمار كوشەلەرىنىڭ قيىلىسىندا ورنالاسادى.

سونىمەن قاتار، جاڭا وقۋ جىلى باستالعانعا دەيىن 900 وقۋشىعا ارنالعان، جالپى اۋدانى 10 مىڭ شارشى مەتردەن اساتىن مەكتەپتىڭ قۇرىلىسى اياقتالادى.

2024 جىلى 1 000-نان استام ۇيگە تابيعي گازعا قوسىلۋ مۇمكىندىگى بەرىلىپ، ولاردىڭ 450-ءى گازبەن قامتىلدى. قالعان ۇيلەردى 2025 جىلى قوسۋ جوسپارلانۋدا. جالپى 45 كم گاز تاراتۋ جەلىسى سالىندى، بۇل باعىتتاعى جۇمىستار جالعاسۋدا.

تۇرعىندار ءۇشىن جايلى ءارى قاۋىپسىز ورتا قالىپتاستىرۋ ماقساتىندا 16 كوشەدە جاياۋ جۇرگىنشىلەرگە ارنالعان تروتۋارلار سالىنادى. جاڭا تروتۋارلار جۇرگىنشىلەردىڭ قوزعالىسىن ىڭعايلى ەتىپ، الەۋمەتتىك نىساندارعا قولجەتىمدىلىكتى ارتتىرادى جانە اۋداننىڭ جالپى كەلبەتىن جاقسارتادى.

كەزدەسۋگە قالالىق باسقارمالار مەن كوممۋنالدىق قىزمەتتەردىڭ وكىلدەرى دە قاتىستى. بۇل وزەكتى ماسەلەلەردى تالقىلاپ قانا قويماي، تۇرعىندارعا قاجەتتى تۇسىندىرمەلەر مەن جاۋاپتاردى جەدەل الۋعا مۇمكىندىك بەردى. تۇرعىندار كوتەرگەن بارلىق ۇسىنىستار مەن ەسكەرتۋلەر نازارعا الىنىپ، جۇمىسقا قابىلداندى.