Кездесу барысында абаттандыру, газдандыру, жол инфрақұрылымы және әлеуметтік саланы дамыту мәселелері талқыланды.

Ауданның кешенді дамуы аясында екі қоғамдық кеңістікті абаттандыру жоспарланған. Оның бірі – дене шынықтыру-сауықтыру кешені жанында, екіншісі – Сырым Батыр және Бойтұмар көшелерінің қиылысында орналасады.

Сонымен қатар, жаңа оқу жылы басталғанға дейін 900 оқушыға арналған, жалпы ауданы 10 мың шаршы метрден асатын мектептің құрылысы аяқталады.

2024 жылы 1 000-нан астам үйге табиғи газға қосылу мүмкіндігі беріліп, олардың 450-і газбен қамтылды. Қалған үйлерді 2025 жылы қосу жоспарлануда. Жалпы 45 км газ тарату желісі салынды, бұл бағыттағы жұмыстар жалғасуда.

Тұрғындар үшін жайлы әрі қауіпсіз орта қалыптастыру мақсатында 16 көшеде жаяу жүргіншілерге арналған тротуарлар салынады. Жаңа тротуарлар жүргіншілердің қозғалысын ыңғайлы етіп, әлеуметтік нысандарға қолжетімділікті арттырады және ауданның жалпы келбетін жақсартады.

Кездесуге қалалық басқармалар мен коммуналдық қызметтердің өкілдері де қатысты. Бұл өзекті мәселелерді талқылап қана қоймай, тұрғындарға қажетті түсіндірмелер мен жауаптарды жедел алуға мүмкіндік берді. Тұрғындар көтерген барлық ұсыныстар мен ескертулер назарға алынып, жұмысқа қабылданды.