جيىنعا قر تۋريزم جانە سپورت ءمينيسترىنىڭ ورىنباسارى سەرىك جاراسباەۆ، سونداي-اق، ەلىمىزدىڭ ۇلتتىق سپورت فەدەراتسيالارىنىڭ پرەزيدەنتتەرى مەن وكىلدەرى قاتىستى.

وتىرىستا ۇلتتىق سپورت قاۋىمداستىعىنىڭ پرەزيدەنتى قىزمەتىن اتقارعان يسلامبەك سالجانوۆ سوڭعى ەكى جىلداعى اتقارىلعان جۇمىسى جايىندا كەڭىنەن ەسەپ بەرىپ، قورىتىندىلادى. قاۋىمداستىق قۇرىلتايشىلارى داۋىس بەرۋ ارقىلى جاڭا جارعى قابىلداپ، ناتيجەسىندە ەركەبۇلان سايدوللاۇلى يلياسوۆ ءبىراۋىزدان قازاقستان رەسپۋبليكاسى ۇلتتىق سپورت قاۋىمداستىعىنىڭ پرەزيدەنتى بولىپ سايلاندى.

جاڭادان سايلانعان ۇلتتىق سپورت قاۋىمداستىعىنىڭ پرەزيدەنتى ەركەبۇلان سايدوللاۇلى سەنىم بىلدىرگەن بارشا قر تۋريزم جانە سپورت مينيسترلىگىنە، قاۋىمداستىق قاتارىنا كىرەتىن ۇلتتىق سپورت وكىلدەرىنە العىس ايتىپ، 2025 جىلعا قويىلعان جوسپارىمەن ءبولىستى.

 «بۇل مەن ءۇشىن ۇلكەن مارتەبە جانە جاۋاپكەرشىلىك. ۇلتتىق سپورت - بۇل حالقىمىزدىڭ جانى، ۇرپاقتاردى بايلانىستىراتىن ءجىپ. ءبىز باي مادەنيەتىمىزدى كورسەتە وتىرىپ، قازاق ەتنيكالىق سپورتىنىڭ بۇكىل الەمگە تانىمال بولۋى ءۇشىن بار كۇشىمىزدى سالامىز», - دەپ اتاپ ءوتتى ەركەبۇلان ءىلياسوۆ.

وتىرىس بارىسىندا سەرىك جاراسباەۆ يسلامبەك تولەۋبايۇلىنا ۇلتتىق سپورتتىڭ دامۋىنا قوسقان ۇلەسى ءۇشىن العىس ءبىلدىرىپ، جاڭا پرەزيدەنت ەركەبۇلان سايدوللاۇلىنا ساتتىلىك تىلەدى. سونىمەن قاتار، ول بارلىق فەدەراتسيالاردىڭ ىنتىماقتاستىعىن نىعايتىپ، ۇلتتىق سپورت تۇرلەرىن الەمدىك دەڭگەيدە ناسيحاتتاۋ ءۇشىن بىرلەسىپ جۇمىس ىستەۋگە شاقىردى.

جيىن بارىسىندا قاۋىمداستىق قۇرىلتايشىلارى مەن مۇشەلەرى داۋىس بەرۋ ارقىلى باقداۋلەت ءسابيتوۆتى قر ۇلتتىق سپورت قاۋىمداستىعىنىڭ ۆيتسە-پرەزيدەنت – اتقارۋشى ديرەكتورى (قوعامدىق نەگىزدە) رەتىندە سايلادى.

ەركەبۇلان ءىلياسوۆ - «Alageum Electric» وتاندىق ەلەكتر ماشينا جاساۋ حولدينگىنىڭ ديرەكتورلار كەڭەسىنىڭ توراعاسى. 2023 جىلدان باستاپ «جامبى اتۋ» فەدەراتسياسىنىڭ پرەزيدەنتى، ال 2024 جىلدان باستاپ ارقان تارتىس بويىنشا ۇلتتىق سپورت فەدەراتسياسىن باسقاردى. ەركەبۇلان ءىلياسوۆ «جامبى اتۋ» جانە «ارقان تارتىس» داستۇرلەرىن ساقتاۋعا جانە قازاقستاننىڭ ەتنيكالىق سپورت كاسىبي دامۋىنا ەلەۋلى ۇلەس قوستى.

ۇلتتىق سپورت قاۋىمداستىعى