2025 جىلدىڭ 28 ناۋرىزىندا تۇندە جامبىل وبلىسىنىڭ بىرقاتار اۋدانى مەن تاراز قالاسىندا جەر سىلكىنىسى تىركەلدى.
جەر ءدۇمپۋىنىڭ جوعارى قارقىنى – 5 بالل – مەركى اۋدانىنداعى مەركى اۋىلىندا تىركەلدى. ت.رىسقۇلوۆ اۋدانىنىڭ قۇلان اۋىلىندا جەر سىلكىنىسىنىڭ كۇشى 4 باللدى، تاراز، شۋ قالالارىندا، قورداي، مويىنقۇم اۋداندارىندا – 2 باللدى قۇرادى.
وبلىس اكىمىنىڭ تاپسىرماسىنا سايكەس جەدەل شتاب قۇرىلدى. وبلىس اكىمىنىڭ ورىنباسارى قاناتبەك مادىبەك توراعالىق ەتكەن ونىڭ قۇرامىنا ازاماتتىق قورعاۋ قىزمەتىنىڭ، جەرگىلىكتى اتقارۋشى ورگانداردىڭ، ءتيىستى ۆەدومستۆولاردىڭ وكىلدەرى كىردى.
زارداپ شەككەندەر تۋرالى اقپارات جوق. اۋداندارداعى تىرشىلىكتى قامتاماسىز ەتۋ نىساندارى شتاتتىق رەجيمدە جۇمىس ىستەۋدە.
قازىرگى تاڭدا مەركى اۋداندىق ورتالىق اۋرۋحاناسىنىڭ، مەركى اۋىلدىق وكرۋگىندەگى «بالداۋرەن» بالاباقشاسىنىڭ عيماراتتارىندا جانە تالدىبۇلاق اۋىلىنداعى تۇرعىن ءۇيدىڭ اسحاناسىندا قابىرعا جارىقتارى انىقتالدى.
ت.رىسقۇلوۆ اۋدانى اباي اۋىلىنداعى تۇرعىن ءۇيدىڭ، جاڭاتۇرمىس اۋىلىنداعى – 6 باسپانانىڭ، اۋىلدىق مەكتەپتىڭ، قاراقىستاق اۋىلدىق وكرۋگىنىڭ كامەنكا اۋىلىنداعى مادەنيەت ءۇيىنىڭ قابىرعالارىندا جارىقتار پايدا بولعان.
ارنايى كوميسسيا وبلىس اكىمىنىڭ تاپسىرماسى بويىنشا كەلتىرىلگەن شىعىندى انىقتاۋ جۇمىستارىن جۇرگىزەدى. ونىڭ قۇرامىنا قر توتەنشە جاعدايلار مينيسترلىگى سەيسمولوگيالىق بايقاۋ جانە زەرتتەۋلەر ۇلتتىق عىلىمي ورتالىعىنىڭ وكىلدەرى كىرەدى.
اۋداندارداعى نىسانداردى ماماندار ارالاپ، احۋالدى كوزبەن كوردى. مەركى اۋدانىندا اينالما جولدارعا 55 ادام، 33 بىرلىك تەحنيكا، ت.رىسقۇلوۆ اۋدانىندا 65 ادام، 40 بىرلىك تەحنيكا جۇمىلدىرىلدى.
«كاجسەرۆيس» جشس وبلىستىق فيليالىنىڭ قىزمەتكەرلەرى (25 ادام، 19 تەحنيكا) مەركى جانە ت.رىسقۇلوۆ اۋداندارىنداعى رەسپۋبليكالىق ماڭىزى بار اۆتوموبيل جولدارىنىڭ (5 كولىك ايىرىعى، 2 تەمىرجول وتكەلى جانە 3 كوپىر) جاي-كۇيىن تەكسەرۋدە. 45 ەلدى مەكەن زەرتتەلدى.
قىرعىز رەسپۋبليكاسىنىڭ توتەنشە جاعدايلار مينيسترلىگىمەن ءوزارا ءىس-قيمىل كەزەكشى ءبولىم ارقىلى ۇيىمداستىرىلدى.
شوڭ-قاقپا جانە ورتو-توقاي سۋ قويمالارى قالىپتى جۇمىس ىستەپ تۇر.
تۇرعىندارمەن ءتۇسىندىرۋ جۇمىستارى جۇرگىزىلدى، حالىقتىڭ دەنساۋلىعى مەن ومىرىنە قاۋىپ جوق.
جەدەل شتاب جاعدايدى باقىلاۋدى جالعاستىرۋدا.
جەدەل دەن قويۋ جاساقتارى دايىندىققا كەلتىرىلدى، تاۋلىك بويى كەزەكشىلىك ۇيىمداستىرىلدى.
پوليتسيا مەن تجد قوعامدىق قاۋىپسىزدىكتى قامتاماسىز ەتۋ بويىنشا شارالار قابىلداۋدا.
8(7262)513575 ءنومىرى بويىنشا «جەدەل جەلى» ىسكە قوسىلعان.
