مەملەكەت باسشىسىنىڭ وڭىرلەردىڭ الەۋمەتتىك-ەكونوميكالىق دامۋىن قامتاماسىز ەتۋ، تۇرعىنداردىڭ ءومىر ءسۇرۋ ساپاسىن ارتتىرۋ جانە ينفراقۇرىلىمدى جاڭعىرتۋ جونىندەگى تاپسىرمالارىن ىسكە اسىرۋ اياسىندا جامبىل وبلىسىنىڭ اكىمى ەربول قاراشوكەەۆ جامبىل اۋدانىنا جۇمىس ساپارىمەن باردى.

ءوڭىر باسشىسى ءبىلىم، اۋىل شارۋاشىلىعى، سۋ شارۋاشىلىعى، سپورت جانە مادەنيەت سالالارىنداعى ماڭىزدى جوبالاردىڭ جۇزەگە اسۋ بارىسىن زەردەلەپ، جاۋاپتى تۇلعالارعا ناقتى مىندەتتەر جۇكتەدى.

جۇمىس ساپارى اۋداندىق ورتالىق كىتاپحانادا جاڭادان اشىلعان №531 سايلاۋ ۋچاسكەسىنىڭ جۇمىسىمەن تانىسۋدان باستالدى. اتالعان ۋچاسكەدە 1229 سايلاۋشى تىركەلگەن. وبلىس اكىمى سايلاۋ ۋچاسكەسىنىڭ ماتەريالدىق-تەحنيكالىق بازاسىن قاراپ، ازاماتتاردىڭ داۋىس بەرۋىنە قولايلى جاعداي جاساۋ، قاجەتتى قۇرال-جابدىقتارمەن تولىق قامتاماسىز ەتۋ جانە ۇيىمداستىرۋ جۇمىستارىن جوعارى دەڭگەيدە جۇرگىزۋ قاجەتتىگىن اتاپ ءوتتى.

ودان كەيىن وبلىس اكىمى توعىزتاراۋ اۋىلىنا بارىپ، ت.توقتاروۆ اتىنداعى ورتا مەكتەپكە سالىنىپ جاتقان جاپسارلاس عيماراتتىڭ قۇرىلىس بارىسىن تەكسەردى. ءوڭىر باسشىسى قۇرىلىس ساپاسىنا ەرەكشە نازار اۋدارىپ، جۇمىستى بەلگىلەنگەن مەرزىمنەن كەشىكتىرمەي اياقتاۋدى تاپسىردى.

ساپار بارىسىندا وبلىس اكىمى وسى اۋىلدا «جاسىل بەلدەۋ» باعدارلاماسى اياسىندا كوكتەمدە وتىرعىزىلعان اعاش كوشەتتەرىنىڭ جاي-كۇيىمەن تانىستى. جالپى اۋماعى 1,2 گەكتاردى قۇرايتىن جاسىل ايماقتاعى كوشەتتەردىڭ كۇتىمى مەن سۋارۋ جۇيەسىنىڭ تيىمدىلىگىنە ءمان بەرىپ، اۋدان اكىمدىگىنە اعاشتاردىڭ جەرسىنۋ كورسەتكىشىن تۇراقتى باقىلاۋدا ۇستاۋدى، كۇتىپ-باپتاۋ جۇمىستارىن كۇشەيتۋدى تاپسىردى.

ورنەك اۋىلىندا وبلىس اكىمى «ايتاق» جانە «تومەنگى ايتاق» كانالدارىن قايتا جاڭعىرتۋ جوباسىنىڭ جۇزەگە اسۋ بارىسىن زەردەلەدى. جوبانىڭ جالپى قۇنى – 2,053 ملرد تەڭگە. قارجىلاندىرۋ ەۋروپالىق قايتا قۇرۋ جانە دامۋ بانكىنىڭ نەسيە قاراجاتى ەسەبىنەن جۇزەگە اسىرىلۋدا. قۇرىلىس جۇمىستارى 2026 جىلدىڭ اقپانىندا باستالىپ، 2028 جىلدىڭ شىلدەسىندە اياقتالادى دەپ جوسپارلانعان. جوبا اياسىندا ماگيسترالدىق جانە ىشكى شارۋاشىلىق كانالدارىنىڭ ءبىر بولىگى بەتونمەن قاپتالىپ، سۋ وتكىزۋ مۇمكىندىگى ايتارلىقتاي ارتادى. ناتيجەسىندە 4 630 گەكتاردان استام سۋارمالى جەردىڭ سۋمەن قامتىلۋى جاقسارادى.

وبلىس اكىمى سۋ رەسۋرستارىن ءتيىمدى پايدالانۋ بۇگىندە اسا ماڭىزدى ماسەلە ەكەنىن ايتىپ، قۇرىلىس جۇمىستارىن بەلگىلەنگەن كەستەگە ساي جۇرگىزۋدى، ساپانى قاتاڭ باقىلاۋدى جانە سۋدى ۇنەمدەۋ تەحنولوگيالارىن كەڭىنەن ەنگىزۋدى تاپسىردى.

ءباسپاسوز قىزمەتى