وڭىردەگى جاعدايدى سارالاۋ ماقساتىندا وتكەن كەڭەستە ەرالى لۇقپانۇلى جاۋاپتى مەكەمەلەردىڭ ەسەبىن تىڭداپ، تاسقىننىڭ الدىن الۋ شارالارى قالاي جۇزەگە اسىپ جاتقانىن باعامدادى.
- وبلىس بويىنشا اۋقىمدى جۇمىستار اتقارىلعان. وتكەن جىلعى سۋ تاسقىنىنان ءتيىستى ساباق الدىق، سول تاجىريبەنى نەگىزگە الىپ، بيىلعى دايىندىقتى تاعى ءبىر مارتە سۇزگىدەن وتكىزىپ جاتىرمىز. اسىرەسە، سىرىم اۋدانىنداعى احۋالدى تالقىلاۋدامىز. ال قاراتوبە اۋدانىنا ەرتەڭ بارىپ، جاعدايدى ءوز كوزىمىزبەن كورەمىز. وبلىستى تولىق ارالاپ شىققاننان كەيىن ناقتى قورىتىندى جاسايمىز، - دەدى ەرالى توعجانوۆ.
كەڭەستەن كەيىن پرەمەر-مينيستر كەڭەسشىسى قالا ماڭىنداعى سۋ تاسقىنىنىڭ الدىن الۋ شارالارىمەن تانىستى. ول جايىق وزەنىنىڭ كۋرەني جانە كومينتەرن شاعىن اۋداندارىنداعى جاعالاۋ بەكىنىستەرىنىڭ بەرىكتىگىن، سونداي-اق دەركول كەنتىندەگى ارىق جۇيەسىنىڭ جۇمىسىن تەكسەردى.
كەلەسى كۇنى ەرالى لۇقپانۇلى وبلىستىڭ بىرنەشە اۋدانىن اۋەدەن شولىپ، قاراتوبە مەن سىرىم اۋداندارىنداعى تاسقىننىڭ الدىن الۋ شارالارىنىڭ ورىندالۋ بارىسىن باقىلاپ قايتتى.
ايتا كەتۋ كەرەك، جۋىردا پرەمەر-مينيستر ولجاس بەكتەنوۆتىڭ توراعالىعىمەن سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتاب وتىرىسى وتكەن بولاتىن. جيىندا ۇكىمەت باسشىسى وڭىرلەر جوعارى دايىندىق رەجيمىندە بولۋى كەرەك، - دەپ تاپسىرما بەرگەن ەدى.
