Өңірдегі жағдайды саралау мақсатында өткен кеңесте Ералы Лұқпанұлы жауапты мекемелердің есебін тыңдап, тасқынның алдын алу шаралары қалай жүзеге асып жатқанын бағамдады.

- Облыс бойынша ауқымды жұмыстар атқарылған. Өткен жылғы су тасқынынан тиісті сабақ алдық, сол тәжірибені негізге алып, биылғы дайындықты тағы бір мәрте сүзгіден өткізіп жатырмыз. Әсіресе, Сырым ауданындағы ахуалды талқылаудамыз. Ал Қаратөбе ауданына ертең барып, жағдайды өз көзімізбен көреміз. Облысты толық аралап шыққаннан кейін нақты қорытынды жасаймыз, - деді Ералы Тоғжанов.

Кеңестен кейін Премьер-министр кеңесшісі қала маңындағы су тасқынының алдын алу шараларымен танысты. Ол Жайық өзенінің Курени және Коминтерн шағын аудандарындағы жағалау бекіністерінің беріктігін, сондай-ақ Деркөл кентіндегі арық жүйесінің жұмысын тексерді.

Келесі күні Ералы Лұқпанұлы облыстың бірнеше ауданын әуеден шолып, Қаратөбе мен Сырым аудандарындағы тасқынның алдын алу шараларының орындалу барысын бақылап қайтты.

Айта кету керек, жуырда Премьер-министр Олжас Бектеновтің төрағалығымен Су тасқынына қарсы шараларды үйлестіру және қарғын су жүру кезеңінің салдарын жою жөніндегі республикалық штаб отырысы өткен болатын. Жиында Үкімет басшысы өңірлер жоғары дайындық режимінде болуы керек, - деп тапсырма берген еді.