قالالىق قوعامدىق دەنساۋلىق ساقتاۋ باسقارماسى 2025 جىلدىڭ قورىىندىسىن جارتيالادى، دەپ حابارلايدى ەلوردا اكىمدىگىنىڭ رەسمي سايتى.

استانانىڭ تۇرعىندارى جىل سايىن شامامەن 100 مىڭ ادامعا ارتىپ كەلەدى. وسىعان بايلانىستى مەديتسينالىق ينفراقۇرىلىمدى دامىتۋعا ەرەكشە كوڭىل بولىنگەن. اتاپ ايتقاندا، مەديتسينالىق ۇيىمدار تاپشىلىعىن ازايتۋ ماقساتىندا ءتورت جاڭا ەمحانا ىسكە قوسىلىپ، «نۇرلى جول» ۆوكزالى اۋدانىندا جەكە مەديتسينالىق ورتالىق اشىلدى.

سونىمەن قاتار ەكى اۋرۋحانادا اۋقىمدى جوندەۋ جۇرگىزىلدى. ولاردىڭ ءبىرى – كوپ جىلدان بەرى قالا تۇرعىندارىنا قىزمەت كورسەتىپ كەلە جاتقان №3 قالالىق كوپبەيىندى اۋرۋحانانىڭ ەسكى عيماراتى.

«عيماراتتى جاڭعىرتۋ بارىسىندا ينجەنەرلىك جەلىلەر، پالاتالار، وپەراتسيالىق بلوكتار مەن دياگنوستيكالىق كابينەتتەر تولىق جاڭارتىلىپ، زاماناۋي مەديتسينالىق جابدىقتارمەن قامتىلدى. بۇل پاتسيەنتتەر مەن مەديتسينا قىزمەتكەرلەرى ءۇشىن قولايلى جاعداي جاساۋعا باعىتتالعان»، – دەيدى باسقارما.

قازىرگى ۋاقىتتا اۋرۋحانانىڭ تەراپەۆتىك ءبولىمى، اس بلوگى، اكىمشىلىك عيماراتى جانە وزگە دە بولىمشەلەرىندە جوندەۋ جۇمىستارى جالعاسىپ جاتىر. اتالعان جۇمىستاردى 2026 جىلى اياقتاۋ جوسپارلانعان.

سونداي-اق №2 قالالىق كوپبەيىندى اۋرۋحانا جانىنان قابىلداۋ-دياگنوستيكالىق كەشەن مەن پەريناتالدىق ورتالىقتىڭ قۇرىلىسى باستالدى. بۇدان بولەك، مەديتسينا قىزمەتكەرلەرىنە ارنالعان 300 ورىندىق جاتاقحانا سالىنۋدا. الداعى جىلى جاڭا كوپبەيىندى اۋرۋحانا، ەسىل جانە نۇرا اۋداندارىندا ەكى ەمحانا، سونداي-اق ەسىل اۋدانىندا بالالارعا ارنالعان تراۆماتولوگيالىق كورپۋس پايدالانۋعا بەرىلمەك.

مەديتسينالىق مەكەمەلەردى زاماناۋي قۇرال-جابدىقتارمەن قامتاماسىز ەتۋگە دە باسىمدىق بەرىلگەن. 2025 جىلى 276 مەديتسينالىق جابدىق ساتىپ الىنعان. جەدەل جاردەم قىزمەتىنىڭ جۇمىسىن جەدەلدەتۋ ماقساتىندا اۆتوكولىكتەر الىنىپ، اۆتوپارك 100 پايىز جاڭارتىلدى.

كادر ماسەلەسىن شەشۋ باعىتىندا دا ناقتى شارالار قابىلداندى. 2024-2028 جىلدارعا ارنالعان جەرگىلىكتى بيۋدجەت ەسەبىنەن رەزيدەنتۋراعا 72 گرانت ءبولىنىپ، 45 دارىگەر جۇمىسقا ورنالاستىرىلدى. سونىمەن قاتار شەتەلدىك مامانداردى تارتۋ ارقىلى تاجىريبە الماسۋعا 64 مەديتسينا قىزمەتكەرى قاتىستى.

«جۇمىسشى ماماندىقتار جىلى» جانە «مەديتسينا قىزمەتكەرلەرىنىڭ بىلىكتىلىگىن ارتتىرۋ جىلى» اياسىندا شامامەن 3 800 مەديتسينا قىزمەتكەرى وقىتىلىپ، ولاردىڭ 59-ى شەتەلدە سيرەك ماماندىقتار بويىنشا بىلىكتىلىگىن ارتتىردى.

بالالار دەنساۋلىعىن نىعايتۋ ماقساتىندا بەس مەملەكەتتىك مەكتەپتە ستوماتولوگيالىق كابينەتتەر اشىلىپ، №1 قالالىق كوپبەيىندى اۋرۋحانا بازاسىندا بالالار ستوماتولوگياسى جۇمىسىن باستادى. سونداي-اق ءاۋتيزمى بار بالالارعا ارنالعان كۇندىزگى ستاتسيونار ىسكە قوسىلدى.

اكۋشەرلىك-گينەكولوگيالىق كومەكتىڭ قولجەتىمدىلىگىن ارتتىرۋ ءۇشىن سيتۋاتسيالىق ورتالىق قۇرىلىپ، قالا دەڭگەيىندە ۇرىقتى قورعاۋ ورتالىعى جۇمىس ىستەپ تۇر. جۇكتى ايەلدەرگە جوعارى مامانداندىرىلعان مەديتسينالىق كومەك كورسەتىلىپ، تۋا بىتكەن جانە تۇقىم قۋالايتىن اۋرۋلاردىڭ الدىن الۋ ماقساتىندا ەكسپەرتتىك دەڭگەيدەگى پرەناتالدىق دياگنوستيكا جۇرگىزىلەدى.

ەلوردادا جاساندى ينتەللەكت تەحنولوگيالارى دا مەديتسينا سالاسىنا ەنگىزىلۋدە. قازىرگى تاڭدا ونكولوگيالىق اۋرۋلاردى ەرتە انىقتاۋعا مۇمكىندىك بەرەتىن جاساندى ينتەللەكتكە نەگىزدەلگەن PACS جۇيەسى ىسكە قوسىلىپ، دياگنوز قويۋ مەرزىمى 30 كۇننەن 3 كۇنگە دەيىن قىسقاردى. ورتالىق سەرۆەردە 126 مىڭنان استام رەنتگەنولوگيالىق زەرتتەۋ جيناقتالىپ، ولاردىڭ 9 مىڭنان استامى وڭدەلگەن.

سونىمەن قاتار ءينسۋلتتى 10 مينۋت ىشىندە انىقتاۋعا مۇمكىندىك بەرەتىن Cerebra جۇيەسى ەنگىزىلدى. جاساندى ينتەللەكتىنى قولدانۋ دياگنوستيكا جىلدامدىعى مەن دالدىگىن ارتتىرىپ، مەديتسينالىق كومەكتىڭ ساپاسىن جاڭا دەڭگەيگە كوتەرىپ وتىر.