12 قازاقستاندىق ەمشى ءداستۇرلى قىتاي مەديتسيناسىن ۇيرەنۋ ءۇشىن شەنسي ولكەسىنىڭ سيان قالاسىنا باردى. بۇل تۋرالى Ras.kz قىتايدىڭ «حالىق گازەتىنە» سىلتەمە جاساپ حابارلايدى.
اتالعان باق-تىڭ كەلتىرگەن دەرەكتەرىنە سۇيەنسەك، ەكى اپتالىق كۋرس تىڭداۋشىلارى ەكى توپقا ءبولىنىپ وقيدى. وقىتۋ كۋرسى ءداستۇرلى قىتاي مەديتسيناسىنىڭ دياگنوستيكالاۋ مەن ەمدەۋ جانە سيپاتتامالىق ادىستەرىنە نەگىزدەلە وتىرىپ، جەرگىلىكتى مەديتسينانىڭ نەگىزگى تەورياسىن، بالالار تسەرەبرالدى سال اۋرۋىن، پسيحيكالىق جانە باسقا دا ءجيى كەزدەسەتىن سىرقاتتاردى ءداستۇرلى قىتاي مەديتسيناسى بويىنشا ەمدەۋدى ۇيرەتەدى. كۋرس زاماناۋي مەديتسينانى ءداستۇرلى مەديتسينامەن، تەوريالىق وقىتۋ مەن كلينيكالىق تاعىلىمدامالاردى بىرىكتىرە وتىرىپ جۇرگىزىلمەك.
«سيان ءداستۇرلى قىتاي مەديتسيناسى مي اۋرۋلارى ەمحاناسىنىڭ حالىقارالىق مەديتسينالىق جانە ينەمەن ەمدەۋ بولىمىندە قازاقستاندىق ەمشىلەر ەرمەنمەن قاقتاۋ، لوڭقا قويۋ، ينە شانشۋ جانە باسقا دا ءداستۇرلى قىتاي مەديتسيناسىنىڭ ۇتىمدى تاسىلدەرىن تىكەلەي ۇيرەنىپ، جەكە تاجىريبە جيناقتايدى. سول ارقىلى ءداستۇرلى قىتاي مەديتسيناسىنىڭ ءارتۇرلى ەمدەۋ ادىستەرىن مەڭگەرەدى»، - دەپ جازدى قىتايلىق باسىلىم.
