جەتىسۋ وبلىسى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 800 مىڭ تەڭگە كولەمىندە اقشا بوپسالاۋ فاكتىسى بويىنشا كۇدىكتى ءۇش ايەل ادامدى ۇستادى.

پوليتسيا انىقتاعانداي، اقپان ايىندا ب. ەسىمدى ازامات "درۋگ ۆوكرۋگ" ءموبيلدى قوسىمشاسى ارقىلى ا. ەسىمدى قىزبەن تانىسقان. حات الماسۋ بارىسىندا ا. ونى ءوز ۇيىنە قوناققا شاقىرعان. الايدا ول كورسەتىلگەن مەكەنجايعا كەلگەندە، پاتەردە تاعى ەكى بەيتانىس قىز بولعان. ءبىراز ۋاقىتتان كەيىن ولاردىڭ ءبىرى وعان باسقا بولمەگە بارىپ وڭاشالانۋ تۋرالى ۇسىنىس جاساعان. ەر ادام مەن قىزداردىڭ ءبىرى بولمەگە كىرىپ، شەشىنە باستاعان كەزدە، كەنەتتەن ەكى قىز ىشكە باسا-كوكتەپ كىرىپ، ايقايلاپ، ونى كامەلەتكە تولماعان قىزدى زورلاماق بولدى دەپ ايىپتاعان. الاياقتار ەر ادامعا ەكى تاڭداۋ جاساتقان. ولارعا 800 مىڭ تەڭگە بەرەدى نەمەسە ولار پوليتسياعا ارىز جازادى. كەپىلدىك رەتىندە ونىڭ جەكە كۋالىگىن، تەحنيكالىق پاسپورتىن جانە جۇرگىزۋشى كۋالىگىن الىپ، تولىق سومانى العاننان كەيىن قۇجاتتارىن قايتاراتىنىن ايتقان. كۇدىكتىلەردىڭ قىسىمىنان سەسكەنگەن ەر ادام ەكى رەت 50 مىڭ تەڭگەدەن بەرىپ ۇلگەرگەن. الايدا 30 مىڭ تەڭگەنى بەرۋ كەزىندە كۇدىكتى ايەل ادامدار قۇقىق قورعاۋ ورگاندارىنىڭ قىزمەتكەرلەرىمەن ۇستالعان. قازىرگى تاڭدا تەرگەۋ جۇرگىزىلىپ جاتىر. پوليتسيا قىزمەتكەرلەرى وقيعانىڭ بارلىق ءمان-جايىن انىقتاپ، قىلمىسقا قاتىسى بار باسقا دا ادامداردىڭ بار-جوعىن تەكسەرەدى.